前全國政協委員劉夢熊及前特首曾蔭權爵士曾經「前後腳」於赤柱監獄服刑，雖然兩人無緣於赤柱相見，不過勢估唔到一場港區全國人大代表換屆選舉，一張提名票令兩人「再續未了緣」嘅特殊關係曝光。政圈盛傳揚言會參選港區人大嘅劉夢熊，已取得入閘所需最少10張提名票，其中一名提名人就係曾蔭權。劉夢熊同曾蔭權均曾身陷囹圄，沆瀣一氣，今次一有機會就眉來眼去「互動」，莫非呢個就係同是天涯淪落人互撐嘅新模式？
新一屆港區人大代表選舉今日(24日)開始展開提名期，下月19日進行投票，多名政界中人首日已報名參選，但暫時未見去年因妨礙司法公正罪被判囚18個月嘅劉夢熊。有政界人士估計，數日前已表明參選意向嘅佢正在收集提名票，報名參選港區人大係遲早嘅問題。
令人意想唔到嘅係，政圈今日流傳一張由曾蔭權簽名，指明提名劉夢熊參選人大嘅提名票，認真震驚政壇。一來外界無諗過佢哋會走埋一起「取暖」，二來今次兩人堪稱「相逢恨晚」，事關劉夢熊今年初刑滿出獄後曾自爆，曾蔭權轉到赤柱監獄後2日，自己就刑滿出獄，因此兩人未能喺獄中見面，佢有委託赤柱監獄嘅懲教人員問候曾蔭權。勢唔到兩人喺獄中緣慳一面，但私底下似乎私交唔錯，仲因為一場港區人大選舉令兩人嘅友好關係曝光，唔知呢啲係咪冥冥之中有主宰呢？
劉夢熊接受查詢時，被問及何時報名參選人大，聲稱「未有任何打算」；當問及目前取得多少提名，以及曾蔭權是否其中一名提名人，則對此不置可否。
雖然今次選舉揭示劉夢熊同曾蔭權明目張膽咁「互動」，不過講到尾，要成為港區人大呢個國家最高權力機關嘅一分子，除咗要擁護國家憲法及香港《基本法》，仲要得到政界人士嘅認可，才有望脫穎而出。對於曾被刑事定罪嘅劉夢熊意圖躋身國家最高權力機關，建制派陣營都心中有數；至於目前仍係戴罪之身嘅曾蔭權雖無參選人大嘅意願，但身為前特首卻無緣進身19人主席團名單，雖無太大意外但都幾難睇。正所謂「面就人哋畀，架就自己丟」，有刑事定罪紀錄嘅政界中人「互動」招搖，如果係以為「負負可以得正」，就認真係痴人說夢喇！
|
鍾意就快D Share啦！
|
|
|