歌手岑日珈(Angie)因為腸絞痛入院，躺在病床上的Angie透露是「腸塞」，她接受東網訪問問覆說：「其實我每一年我啲腸都會抽筋，跟住一抽起嚟就痛到食唔到嘢，又會想嘔，就要入醫院吊鹽水唔准食嘢，照吓條腸，睇吓條腸會唔會爆咗，今次都冇事嘅，只不過塞住咗。」
13歲做過大手術
Angie解釋她在13歲讀一中時候做過大手術，所以她的腸胃一路都不好，醫生都講過是後遺症，她說：「醫生講過會跟我一世，喺食嘢方面、啲腸要小心處理。所以我由13歲開始到依家23歲，呢十年每一年都會有一次咁，我好多時入醫院都係因為咁樣囉，今次好突然咁好痛，我喺屋企廁所痛到坐喺地下，要即刻入院。」
不能進食、打止痛針
目前Angie要吊鹽水，不能進食，因為已經打了止痛針，所以腸胃緩舒到已經冇咁痛，她說：「不過撳落去都仲有啲痛。」Angie坦言想起13歲時的大手術，她就會好想喊，她說：「唉，嗰時因為盲腸炎去咗醫院，嗰醫生做得唔好，因為佢等到我條腸爆咗先推我入手術室，做嘅時候佢又冇清潔好晒嗰啲膿喎，做完手術隔咗一個星期，點解普通盲腸炎，我咁耐都行唔到路、康復唔到，咪再去照囉，原來啲膿已經發脹咗，演變成腹膜炎、盆腔炎，成個腹腔、肚全部都發緊炎，要即時入手術室再做一次開刀，嗰陣時我記得住咗醫院一個月，我係入咗ICU，因為好大嘅手術，所以之後醫生都話我食嘢只能食6成飽，同埋條腸真係比普通人弱好多，因為條腸真係剪咗好多，所以好多嘢我未必做到，譬如肚仔唔可以做太劇烈嘅嘢。」
有搵律師解決
Angie坦言當日是在公立醫院做手術，因為她入院時，並非以第一急症處理，她說：「嗰時要等位吖嘛，佢哋心目中大肚婆或有咩意外先係最急症，但等到我條腸爆咗，我睇住自己個肚變咗好似十月懷胎咁大，爆嗰刻個肚真係勁痛，佢哋即刻推我入手術室，（你事後有冇投訴？）有呀，投訴咗呀，媽咪都有搵律師，好似係搵法援，但最後都告唔入，佢哋話我冇死到，所以咪唔得囉。」她還幽默笑說：「所以我曾經都有瘦過，跌到82磅，因為30日冇得食嘢，齋吊營養液，嗰時好瘦，唔似依家肥到咁。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
