久未露面的歌手謝安琪（Kay）出席聖誕亮燈活動時，以低胸黑色連身花裙配上一頭短髮現身，身材比生B後清減了不少！接受訪問時，Kay直言好開心，咁耐冇見大家今日第一次出席活動，見到咁多歌迷覺得好感動。問到係咪全面復工，她指其實原定計劃係2018年年中或年尾，推出新歌後才全面復工，但因為簽到麥浚龍（Juno）公司旗下嘅消息傳出後，獲得很多工作邀請，而加快咗復工：「如果公眾適合嘅話，就會做住先，提早恢復狀態，所以個個月都不停做運動，之前見過都仲係肥嘟嘟，控制飲食同埋意志去恢復狀態，都需要好多體能。（減咗幾多？）都有十幾20磅，其實唔係減肥，係體能好咗，自己都鍾意咗做運動！（經常一家人做運動？）阿聰不嬲對運動都好同意，佢都好開心，佢以前無敵是最寂寞，冇人陪佢，但係依家我哋就好似gym buddies，約埋一齊去舉鐵同跑步！」
代張繼聰派定心丸
另外，談到有指老公張繼聰被無綫封殺，Kay坦言在報道出街已經聽到這個消息，很感激有好多前輩及朋友都有傳短訊慰問，笑言有朋友擔心兩公婆的生計，而介紹很多工作機會給自己同阿聰，就知道大家好錫阿聰，亦叫大家唔使擔心，因為阿聰嘅工作都安排得好好。
唔簽畀Juno唔得
至於問到兩公婆都要工作，會否冇時間湊囡囡？Kay說：「好多謝Juno，佢真係三顧草廬，嚟咗我度4、5次同我傾，佢好體貼，知道我屋企好重要，佢畀到信心我兼顧好家庭先工作，佢對我工作都有好多諗法，例如形象同音樂，佢真係好好，唔簽佢好衰，唔可以唔簽佢，我老公都抗拒唔到佢嘅溫柔！」問到簽約費係咪8位數，Kay即笑言條數好難計：「數字嘅嘢好複雜，Juno第一次做人契爺，話要收返我上契費，我叫佢同BB傾，喺簽約費倒扣返，有排先計到，真係好難計！」
同盡辦法都未識
談到囡囡只懂得叫「爸爸」，Kay搞笑指用咗好多唔同方法，例如喺佢耳邊講同唱歌，但始終都冇叫到一聲「媽咪」：「好嬲，我全職湊佢㗎嘛，但係叫我都係叫爸爸，呢個前世情人嘅魅力，冇辦法！」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
