台慶頒獎禮收視闖高峰33.6創近年佳績
無綫今年台慶頒獎禮錄得33.6點高收視，成績令人振奮，台前幕後昨晚舉行慶功宴。「視后」唐詩詠透露生病關係至今仍未慶祝，不介意舊愛洪永城請她食飯。而「男、女配」得主陳山聰與朱晨麗忽發奇想撩合演姊弟，被批「唔夠班」得獎的朱朱承諾會上堂增進演技。
無綫《萬千星輝頒獎典禮2017》錄得七天跨平台總收視33.6點，約有220萬觀眾收看，是自2014年以來最高的台慶頒獎禮收視！big big channel及跨社交媒體平台總視頻瀏覽量更突破810萬，成績如此驕人，無綫昨晚於電視廣播城筵開11席慶功，無綫主席陳國強、無綫集團行政總裁李寶安、無綫副總經理（節目及製作）杜之克、高層余詠珊、樂易玲及曾勵珍等都有出席，由杜之克代表發言：「觀眾先係我哋嘅大老闆，得到大家認同先有好收視，希望今年會有更多嘅慶祝活動。」余詠珊則寄語無綫各方面在新一年更精彩。陳國強發表新春賀詞，表示領導一間規模這麼大的公司，自己很有壓力，坦言曾因一些問題而失眠。
陳山聰撩朱晨麗演姊弟
出爐視后唐詩詠受訪時被問得獎後如何慶祝，她竟然答沒有：「冇啊！病咗食完藥就瞓覺，醫生開咗啲強勁嘅藥畀我，連車都揸唔到。（瞓咗幾耐？）瞓咗一星期！期間有去睇周慧敏演唱會，但中途好想瞓覺，今晚唔敢食藥，嚟緊都有朋友約我慶祝。（洪永城？）我哋個Group冇佢，佢亦冇約我，佢約冇所謂o架！梗係佢埋單（到時見到記者又走？）我真係驚o架！」至於視帝王浩信因身在菲律賓拍攝劇集《兄弟》外景而缺席。
「最佳男配角」與「最佳女配角」陳山聰及朱晨麗談到收視佳即互相恭喜對方，山聰表示希望百花齊放，與朱朱今年都有新劇出街：「我哋未合作過，希望有機會（演乜嘢？做姊弟？）都好喎！」較山聰年輕的朱朱笑說：「做你阿嫲都得嘅！我演員嚟o架嘛。」提到奪「女配角」獎後不時被狠批未夠班，問到會否自我值增爭番啖氣，朱朱說：「多謝觀眾包容，我嘅演藝生涯都係啱啱開始，都鞭策住自己。（搵個老師學習演戲？）我嚟緊都會上堂o架喇！」
汪明荃嗌抖抖暫停拍劇
另外，汪明荃於頒獎禮當晚發表的「山頭論」獲不少觀眾激讚，她受訪說：「回應咗，所以唔再講。（加人工最實際？）一陣老闆嚟，我問吓先。（嚟緊會再拍劇？）要諗吓先，2017年用力太犀利，所以要休息吓，但唔會太耐。拍劇壓力好大，自己未準備好。（亞視開台，吳雨將你同何守信嘅舊緋聞擺上枱！）佢哋唔需要呢啲，靠實力嘅。（介意？）我都冇睇，都唔知點上去睇。」
文：影視組
|
鍾意就快D Share啦！
|
|
|