歌手衛蘭（Janice）昨晚（14/1）結束一連三場的《Oh My Janice》紅館演唱會後，於後台接受訪問。原來Janice在演唱會上一直甚少講話，除了覺得自己不擅長說話，亦是因為開騷前患上嚴重感冒：「個演唱會兩個月之前開始準備，開騷之前幾日我突然病得好犀利，鼻水倒流搞到喉嚨好唔舒服。（點樣可以堅持三晚完成演唱會？）靠意志力囉，其實我有好唔開心，都係一個大嘅影響嚟，我會希望自己個狀態可以係最好。（演唱會完滿結束幾時再開Part 2？）未知幾時呀，嚟緊會去內地開騷先，應該要到二月中先有得放下假抖吓，但係冇長假。」
Janice又好多謝演唱會的三組嘉賓at17、AGA同陳柏宇：「好感恩可以邀請到佢哋，幾位都係我喺Event常見同埋好欣賞嘅歌手，一直都好想可以合作，可以聽到佢哋唱我嘅歌感覺好唔同。at17係我一入行就認識嘅組合，AGA就係喺錄音室成日見同埋返教會而熟絡，Jason就係一直好欣賞。（仲有細妹？）係呀，好感動，同妹妹由細到大都一齊唱歌，好開心。」
每次開騷大家都會留意Janice的身形，頭場時她曾在台上自言今次演唱會增了10磅，她就笑着回應說：「我冇特登去增肥，但亦都冇刻意去減肥，其實我都有做gym同跑步。（唔怕脊柱側彎嘅問題影響到？）我都驚會傷到spine（脊柱）㗎，之前試過運動時有郁動傷過Lower back（腰），所以再做番運動都要少少勇氣，同埋會有Trainer一齊睇住。」
講到今次演唱會的歌單，Janice就話沒有想過特登唱哪幾首：「其實係有喺網上畀粉絲投票，想揀啲比較少現場唱過同少啲派台歌，唱多啲特別少少嘅歌。」
Janice更特意為表演《Make You Feel My Love》而去學了一個月鋼琴，但可惜頭場時都有彈錯：「下次我會先少少哋喺十幾個人面前彈一次先，今次冇，一嚟就係上台表演。」
講到演唱會的表演主題帶點音樂劇感覺，有份親自監督演唱會製作的Janice話：「係呀，個主題都帶少少自己嘢，自己都鍾意有藝術感啲嘅表演形式，有啲古怪感覺。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|