袁偉豪搏命賺醫藥費 救患癌父親
袁偉豪憑《城寨英雄》「牙佬」一角成功彈起，早前在無綫劇《使徒行者2》亦表現亮眼，獲得不少掌聲，他直言兩劇都是代表作，希望日後繼續保持水準。前年他在台慶頒獎禮獲獎時爆喊，他直言如此激動，緣於媽媽多年來默默支持其演藝發展，又要不辭勞苦照顧他的患癌爸爸，現在搏命賺錢的他，很開心終可成為家庭經濟支柱：「想全世界嘅人知我媽咪好偉大！」
物質上全力支持
相信很多觀眾依然對袁偉豪前年在台慶頒獎禮獲「最受歡迎電視男角色」時，喊住多謝媽媽一幕印象深刻，提及此事，他即變得非常感觸：「一直以來都好感激我媽咪，因為我媽咪、我婆婆嗰邊嘅人都一直好錫我，咁當然我嫲嫲都好錫我，但去年年中佢走咗，雖然係104歲、笑喪，但因為佢走時我唔喺佢身邊，所以覺得好遺憾。」最令他感慨則是母親多年來不辭勞苦，照料他患癌的爸爸：「爸爸之前有鼻咽癌，係五、六年前嘅事，醫番好，但之後喺個肺都有事，又翻發，公立醫院、私家醫院都睇勻。定期都要使一筆醫藥費，因為又要睇中醫同買標靶藥，係多咗（經濟）負擔。我因為工作，始終唔係成日行得開，所以盡能力我都會喺物質上（金錢）支持。而我唔喺香港，就惟有同媽媽傾電話，跟進住爸爸嘅情況。」
為了報答媽媽一直以來的無私付出，事業開始上軌道的他肩負養家重任，希望可以讓家人放下重擔：「身邊嘅人都好幫助我屋企人，無論經濟上、精神上，媽咪都付出咗好多。早幾年我自己經濟能力未符合條件，好多嘢都要靠屋企人幫手，依家漸漸出頭，我一定係成為我屋企嘅經濟支柱，好多嘢需要我嘅地方，我都會義不容辭咁幫手，所以係會零舍感觸，都想世界嘅人知我媽咪好偉大、好錫我，亦委屈咗好多，要照顧爸爸真係好辛苦。」
無悔入行豐富經歷
袁偉豪在新劇《棟仁的時光》和《三個女人一個「因」》擔任男一，開始在芸芸小生中站穩陣腳，問到是否以視帝為目標？他表示：「反而我冇特別去諗，我覺得當然呢個可以視為目標，但如果每一次都當係交易咁做，會畀自己更大壓力。如果係樂在其中，就可以畀觀眾睇到袁偉豪更多嘅嘢。之後我希望身體力行多啲，用自己嘅力量幫助有需要嘅人，做吓慈善工作。」
十多歲已入行，問袁偉豪有否一刻後悔？他答：「入行廿年嚟都冇後悔，我覺得人生裏面冇乜嘢令我後悔過，因為好多嘢冥冥中有主宰，廿年嚟嘅學習同經歷先至有今時今日嘅我。」至於廿年來誰影響他最深？他直指早年曾與恩師鍾鎮濤夾Band時，從對方身上學習很多東西：「佢好叻，人生經驗好豐富，亦都係一家之主，養住好多人。佢有好多經歷，正正就係我幫佢做嘢嘅時候，佢嗰幾年都係喺佢個經歷當中奮鬥。」
不滿網民針對翠如
袁偉豪在早前播畢的無綫劇《使徒行者2》中，經常以「天堂哥」身份晒肌搶觀眾眼球，他直言角色前後段性格大為不同，到臥底身份揭曉後更顯內心矛盾，他坦言槍殺周柏豪的幾場崩潰戲最難處理。問到是否視《使》劇為其代表作？他指之前《鐵馬戰車》的「施馬Sir」、《拆局專家》的「石頭」和《城寨英雄》的「牙佬」，都是心愛的角色：「好多謝每一位編劇，好希望每一套都係我代表作，而唔係單單只係一、兩套劇。」
雖然拍檔黃翠如在故事末段憑三段喊戲令人刮目相看，但仍有不少人對她甚為挑剔，袁偉豪即為對方抱不平：「其實佢好用心演戲，佢好想努力繼續學習，但係每一次都提唔起信心，就係因為網民永遠會針對佢，令佢個人好唔夠自信！呢一刻我忍唔住做正義朋友，話畀網民或者網上平台聽一啲正面訊息，唔好夾硬去扭曲一啲嘢，大部分人都覺得翠如有進步，點解仲要有人推佢落個窿度再搵泥埋住佢？好唔公平！」
文：若瑟
攝：唐豁莊
服裝：Harvey Nichols
|
鍾意就快D Share啦！
|
|
|