【《蘋果》專訪】
【閃耀人生女人心 琦琦系列之1 信是有緣】任達華和名模琦琦是圈中出名恩愛的明星夫妻，去年更是兩人結婚20周年紀念。他們的愛情路，由一同拍廣告、拍雜誌封面，到89年開始拍拖，原來早在雙方未認識前，任達華已暗戀琦琦一年，緣份令他們一起工作。經過八年愛情長跑，在97年結成夫婦，戀足28年的他們，琦琦不時大讚華哥浪漫。
現年50歲的名模琦琦早前接受本報專訪，談到早年跟現年62歲的丈夫任達華相識的經過，雖然沒有動地驚天愛戀過，卻是另一番幽情，緣份串連他們在一起：「第一次見呢，嗰時係我拍咗叫人參加《香港小姐》嘅宣傳片，華哥就係做港姐主持，之後慶功宴，嗰次係第一次見佢。跟住我哋一齊拍咗個皮草廣告，又一齊拍雜誌封面，都好有緣。」
作為名模琦琦身高已有180公分左右，而華哥給她的第一印象亦是「高」，她說：「高！覺得呢個男仔好高，好gentleman，好好傾，同埋佢好鍾意攝影，我又有啲攝影師朋友，所以慶功宴一傾就傾咗幾個鐘頭。」雖然投契，但當時仍未談出戀情來，琦琦大爆原來早在89年二人拍拖前，華哥已從雜誌上暗戀上自己，卻不敢表白，亦不敢追求，她說：「佢後來同我講，佢第一次喺雜誌見到跨頁，係我着住牛仔褲、白恤衫、戴住一頂帽，當時佢已經諗，如果呢個女仔做我老婆就好喇，嗰時佢係唔識我。」
維也納定情
兩人相識一年，只是朋友，直到兩人再次在維也納相聚：「有次我返咗維也納屋企，佢幫TVB去維也納拍旅遊節目，咁啱撞到，呢啲真係緣份。我爸爸、媽媽就話要盡地主之誼，請佢哋成班crew同華哥，去我屋企食飯，跟住就TVB啲人起哄，鼓勵佢追我，嗰次之後，華哥就大膽啲，敢約我喇。」
琦琦在維也納小康之家長大、十幾歲就在巴黎行騷，任達華則是土生土長香港男仔：「我識佢時，佢啱啱出嚟拍戲。喺香港，都係佢帶我去睇戲，去山頂睇夜景，去海邊，佢都幾浪漫，去吓元朗南生圍、離島，睇好多大自然。我喺外國長大，鍾意大自然，初初唔係咁鍾意香港，後來就鍾意，又有一個鍾意嘅人喺香港。」
沙灘食麥記
琦琦與華哥拍拖都非常慳家兼自然，華哥間中會開着日本小房車，載琦琦去淺水灣，坐在沙灘談情吃麥當勞：「有時都食燭光晚餐，但我同華哥都係隨意嘅人，我哋兩個遊車河去到淺水灣，喺麥當勞買個魚柳包，就坐喺沙灘度傾偈、食嘢，我哋都係夜晚七點幾去到，感覺好得意，幾浪漫。佢係雙魚座，個人好浪漫。」
採訪：林妙萍
化妝、髮型：淑貞
|
鍾意就快D Share啦！
|
|
|