林欣彤與抑鬱抗戰時，當時佢身邊有男友羅孝勇支持，可惜感情捱不過三年，二人於13年分手，大家仲有冇聯絡呢？「而家少咗好多。」Mag同羅孝勇一齊經歷過唔少嘢，到最後都要分手，係唔係timing問題？「我唔知咩叫做啱定唔啱嘅timing，又或者其實嗰個人一定要同你行到最後，佢先應該出現，我覺得唔係咁，所有嘢都有佢嘅原因，有佢嘅果，我遇過嘅每一個人，喺嗰個timing出現，佢其實都一定有成就我，或者喺我生命中種下某啲美麗嘅種子，所以我唔會話，因為而家唔可以繼續行落去，而覺得我哋錯timing，唔係囉，我都好感激遇過每一個同我相愛過嘅人。」
今年27歲嘅Mag，其實細細個嗰陣已經想快啲結婚，有自己嘅家庭！她說：「以前譬如定咗幾多歲結婚、幾多歲生仔，已經過晒，所以而家已經無好想快啲結婚生仔，我覺得唔可以咁樣諗，唔係我想就有，所以隨緣啦，而家其中一個生活態度就係活在當下，如果呢一刻係單身，呢一刻未結婚生仔，就享受吓單身生活。」咁唔知佢而家對愛情仲有冇憧憬呢？「點都會有嘅，我相信好多單身人士都應該會有，有時都會想有個人，譬如想食pancake時，打個電話就即刻出嚟陪我，或者有人接收工，我又接吓人收工呢啲溫馨嘢。」好多人覺得佢同許廷鏗好襯喎！她笑說：「係咩？咁好笑？我同佢之間唔係愛情嗰種觸電，我覺得佢喺靈性上好影響到我，有好多嘢我哋之間嘅信任唔係好需要解釋，我哋唔係成日WhatsApp，成日傾電話，或者成日見嘅朋友，但係每一次知道對方有啲乜嘢要幫手，或者需要扶一把，唔使講嘢，就會去做。」
撰文：海 山
攝影：黃志明
錄影：葉志明
髮型：Terry yeung @corner
服裝提供：Rococo
場地提供：草民café
來源 source: http://nextplus.nextmedia.com
|
鍾意就快D Share啦！
|
|
|