新聞主播近年青黃不接，電視台當然頭痕，但主播們外闖卻處處開花，大家都有好成績。各散東西，八位前新聞主播蔡雪瑩、林燕玲、黃婉曼、鄭萃雯、葉昇瓚、姚雋彥、駱文捷及陳美茵趁新春相約吃飯，席間大談湊仔經，幸福人妻蔡雪瑩更謂幫兒子報了10間學校。
今日年初二，八位在不同時期擔任新聞主播或天氣女郎的前主播，齊集尖沙嘴食飯慶新春，分別是腹大便便的蔡雪瑩、新婚不久的林燕玲、第一代天氣女郎黃婉曼、兩子之母鄭萃雯、人父葉昇瓚、人夫姚雋彥、人妻駱文捷及八位中年紀最輕的陳美茵。八位前主播入職及離職有先後，故過去未有機會排排坐開餐，黃婉曼坦言齊人見面好開心，開餐前大家更應節齊齊「撈起」，希望新一年順順利利，幾位人母人父更大談湊仔經，雞啄唔斷傾不停。
剪片整Profile
各人又分享自己近況，去年7月榮升人母的黃婉曼，表示現在忙於照顧女兒，還要打理其麵包學校生意，她說：「以前以為開咗間舖就得，但其實好多嘢做，文書嘢都好多，但好唔想錯過囡囡嘅成長，所以𠵱家每日都會同佢影相，出門口就最唔捨得，要用一個鐘同佢say goodbye！」
前年為老公朱威霖誕下得意B仔的蔡雪瑩，早前宣佈再懷孕，現在陀B五個月的她，最近忙為兒子準備入學面試，更自爆「好癲」，替囝囝報了10間學校。她說：「做咗媽咪先知𠵱家學校面試連父母都要interview，我又同囝囝整咗個profile要剪埋片，𠵱家一個星期有兩日要去面試。」
至於去年4月榮升人妻的駱文捷，現轉職市場推廣及公關工作，她說：「年尾比較忙，因為要幫公司搞好多event。」在醫療公關公司任顧問的鄭萃雯，則表示新年前要完成大量醫生訪問，而新婚的林燕玲自爆廚藝欠佳，新年期間除會爭取時間見朋友，希望可以精進廚藝。
葉昇瓚拉客
三年前已升呢做人父、有一女的葉昇瓚，太太去年再為他誕一子湊成「好」字，現於財經公司任公關的他，自認是好爸爸，即使換尿片都難不到他，他又與以前負責報體育新聞、現於樂視繼續做體育相關工作的姚雋彥齊齊「拉客」，笑指他們都會接freelance工作。另外，前年離開無綫，跟男友合資創業搞網上新聞平台的陳美茵，表示新一年依然會將全副心思放在工作上，希望有更好成績。
採訪：小米
場地提供及贊助：利寶閣（The ONE）
|
鍾意就快D Share啦！
|
|
|