型男古天樂向來對狗情有獨鍾，有多年養狗經驗的他，曾收養戲中「拍檔」阿Lo，古媽媽亦對牠疼愛有加，愛犬離世時，古家上下都傷心不已，古仔自此之後堅決不再養狗！踏入狗年，他應邀到愛護動物協會探訪兼「拜年」，愛心爆棚的他面對「老弱孤雛」笑容滿面，抱BB狗之餘又對後天殘缺的唐狗照顧有加，Mr.Cool瞬間變成Mr.Warm！
諗計重振樂壇
談到狗年犯太歲，肖狗的古仔接受東網訪問說：「咁我都信呢啲嘢，所以會去攝太歲，但個人覺得犯太歲未必唔好，只係今年應該會有啲大改變啫！（例如成為演藝人協會會長？）咪係囉！」談到大家對他「新手上任」寄予厚望，更有歌手指他計劃「振興樂壇」，他坦言正在籌備連串方案：「好似我哋諗緊用咩方法，可以幫啲新進歌手唔使簽死公司，又可以有作品推出。我覺得協會內最需要幫助嘅係前輩演員，同埋龍虎武師，佢哋好多都有新傷舊患，生活能力可能有啲問題。等我哋再從長計議吓先，依家唔講住，遲啲會有進一步嘅消息可以公布！」古仔平日要拍戲，同時兼顧幕後工作，百忙中仍樂意抽時間幫人，例如多年來一直低調捐錢，在內地辦學建校近百間。提到今次為演藝人協會「牽頭纜」，日後可能分身不暇，他謙稱：「忙歸忙，時間點安排係自己嘅啫，可以嘅。」
放假忙住去飯局
古仔每逢農曆新年都一定會抽空過節及陪伴家人，他說：「今年好好，可以休息成個星期，可以放肆去食賀年食品。我最鍾意蒸蘿蔔榚，可以食足一底。我屋企興過年食糖不甩，細個嘅時候我仲有幫手整添，依家都會食啲，但擔心難消化同太甜。」問到對狗年的展望，他直言只想身體健康。他又提到新年大掃除不喜歡假手於人：「一定自己執，平時放埋好多嘢，會一次過清晒。平時可能少啲機會見朋友，新年就最好約人，可能初一至初七都有局㗎！」
髮型：Dan Tam@Orient4
化妝：Carmen Man
場地：愛護動物協會
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|