狗年新娘雨僑，鐵定3月31日嫁給拍拖7年的羅力威，搞咗地下情好耐，俾人影到咁多年都唔認拍拖，直至最近先認係情侶，轉頭又公佈婚訊，雨僑日前率先接受本報專訪，講解呢段地下情：「好開心，但係好平靜，雖然我好遲同大家講，但係落手落腳籌備有一年，所以自己一路好清楚個進度，但係就依家公佈係好開心，又無話太緊張。」
雨僑仲講到佢嘅Dream wedding：「我哋之前好想去沖繩結婚，都去咗睇啲小禮堂，原來發覺好靚，突然又掛住香港好多朋友、同事、家人，如果請唔晒所有人來會覺得好可惜，好想佢哋一齊見證，可容納咁多人都只係得一兩間，都唔係大家心目中好白色嗰隻，咁所以都係香港搞，有陽光草地，選擇都唔多，所以最後揀o依家呢度。」
雨僑同羅力威玩咗地下情咁耐，究竟實際上係識咗幾耐？雨僑就話：「應該係7年，其實佢好似發表婚訊咁寫，我哋係唔知咩幾多年，咩紀念日，我哋從來都無計過，以後有個日子3月31可以紀念日。」而佢哋嘅相識就係喺新人時：「最初識係我嘅音樂會，佢做我嘉賓，嗰時都係幾last minute，嗰陣都係入行無耐，我唔知係公司安排，當時係我老闆搵阿威做嘉賓，大家又差唔多年資，好似邀請無咁尷尬，舊人又要好早通知，如果唔係唔夠誠意，咁大家差唔多年紀，差唔多年資，所以好適合。」
雨僑唔係第一次拍拖，但係羅力威係佢第一個圈中男友，咁佢對羅力威第一個印象又係點呢？雨僑話：「因為大家唔係好熟，嗰陣我冇諗太多，嗰個係自己個騷，已經要練好多琴，好多舞，無諗咁多嘢，但係好開心佢來，嗰一部份係我好輕鬆嘅地方，佢又幫。頂咗一首歌，等我換衫，係成個騷最開心係呢一部份。第二場就有啲失落，因為無嘉賓，跟住個咗幾個禮拜佢又開騷，佢嗰邊又邀請我睇，完咗都有去後台打招呼，但係無咩傾到偈，跟住返屋企瞓覺，涼都沖埋，佢先至叫個小提琴手打俾我，叫我去慶功喎！嘩，我心諗你唔好聽日先打來，因為呢個開始，大家就話兩個開完騷，一齊食餐飯，就呢個飯終於約咗幾個月就食喇！」
木口木面嘅羅力威又係點樣追到雨僑呢？答案係無追過，雨僑話：「都無咩話熱烈追求，係大家好似好old school咁約出來去扒房鋸扒，大家約出來都會帶個電燈膽，第一次約食飯打邊爐，我又帶咗3個同事，佢又帶咗一個同事，我記得我哋第一次兩個出來去鋸扒，我媽話我化妝，仲耐過我食餐飯，八點半返到屋企，諗番起都覺得好笑，嗰時我好快就生日，做個完騷之後，佢送咗隻我無戴過嘅錶，好樸實，首先我係唔係好戴錶，啲款好似老師咁，就係樣好踏實咁正式開始。」
最港電影大獎投票網址
http://bit.ly/thekongestfilmawards
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|