五月天今年5月將喺迪士尼樂園舉行6場露天演唱會，門票今日公開發售，今早九點幾，尖沙嘴通利琴行門外，已有近百人排隊，早上10點售票系統出現故障，要十點半再先開賣，一眾「五迷」耐心喺門外守候，秩序良好；同時「特高娛樂制作有限公司」fb亦留言：「剛收到Cityline購票通的通知，有幾個票站有系統更新問題，網站、票站將於10:30am才統一開始售票。」
約早上9點10分，個唱門票開賣前，16位「五迷」一早喺尖沙嘴通利琴行正門，手挽手排隊，以防有人插隊，「五迷」更高舉牌指自己係小小五迷只求入場，叫人唔好打尖，「就算失望，不能絕望」，點知9點20分有工作人員叫啲fans排去箭咀牌後排隊，先可以開始賣飛，16個來自大陸嘅「五迷」即走過去再排隊，而一班南亞裔人士企咗喺箭咀牌前，工作人員聲稱嗰堆南亞裔人士係排頭位。
直至9點45分，工作人員再出嚟confirm排隊人士嘅次序，5分鐘後，工作人員再出嚟，通知fans購票通故障，現場有近20個警員standby，去到10點35分，工作人員步出，準備派籌，點知前排嘅南亞裔人士疑似越加越多人，南亞裔人士聲稱自己每人有十個朋友，個職員即話：「10個？你唔好話有一百個，再係咁我唔派於是停止派籌」工作人員仲話如果搞唔掂啲秩序係唔會開始派籌，然後叫南亞裔人士搵4個人出嚟。
現場歌迷同工作人員爭論緊派俾綠色箭咀前定後嘅人，職員叫佢哋自行搞清楚，否則唔派籌，職員再出嚟問有冇問題，但佢只問頭幾位南亞裔人士，有無綫主播幫排綠色箭咀位嘅人話有問題，然後個職員話：「你唔係排隊嘅，唔好出聲。」之後安排頭十個入去，當中有4個係南亞裔人士。
排隊嘅Kelvin投訴表示好憤怒，強調南亞唔係喺隊入面，但通利工作人員依然畀佢哋入，佢話事後會投訴。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
