天王郭富城（城城）到西九出席慈善繪畫活動，更去草地看小朋友畫畫。他認為活動很有意義，成為人父後特別希望做多些慈善活動：「令到世界知道我哋關懷貧窮地方嘅小朋友。我身為家長，見到爹哋媽咪帶住小朋友，今日天氣又咁靚，又健康又快樂，唔只可以親子畫畫，仲可以做善事。」他認為每個家長的心願都是小朋友能夠於有希望的世界健康快樂地成長以及實現夢想：「呢個活動希望令家長由小朋友細細個就教佢哋有幫人嘅心，令兒童幫助兒童。今日嘅善款全部捐去山區，幫助孕婦有基本醫療、檢查同疫苗，避免感染瘧疾或愛滋。」他表示曾經親身探訪，知道山區衞生環境很差：「電影我都去拍過，加上身為大使，別有一番感受。」
會帶囡囡出活動
城城坦言想過帶女兒出席活動，不過女兒太細個，將來一定會帶：「等佢認識吓、感受吓呢個世界。我有信佛理念，幫人係好重要嘅訊息，希望佢都有呢種精神。」問到可想女兒成為畫家？他表示在台上也有想過：「我頭先出咗去睇，每個小朋友都唔同，有啲畫得豐富啲，有啲色彩燦爛啲，有啲就色彩單調啲，但都好有心機。親子過程好重要，等小朋友分享諗緊乜，帶正能量畀佢哋同建立關係。」
遺傳跳舞基因
問到可有為女兒唱歌跳舞？他笑說：「佢已經有我嘅基因。（教佢你嘅招牌手勢？）佢遲啲會做㗎喇。」他直言感受很深，尤其是看見穿上畫家服裝的小朋友：「好得意呀，啲漫畫都畫得好趣致，我就諗我嘅小朋友或朋友嘅小朋友將來會點樣成為畫家？」他自言小時候都很喜歡畫畫，幼稚園時試過畫了老虎仔並貼堂，令他印象很深刻：「嗰時好有優越感，諗起好多回憶。唔好以為大咗就會唔記得，其實對小朋友影響好大，不過依家方便好多，可以影低，幅畫會舊，但回憶唔會變。」
要保護小朋友
提到早前女兒被周刊偷影，城城坦言嚴正希望傳媒不要再公開女兒的樣貌：「希望佢哋自律，喺娛樂圈我哋唇齒相依，但希望傳媒帶出嘅訊息係正面嘅，唔係影咗又唔保護小朋友，我覺得小朋友係要保護，尤其是咁細個，咁會影響佢成長，希望佢哋高抬貴手。」
「心入面有陰影」
至於可敢再帶女兒出外？他說：「正正因為有咁嘅行為，有狗仔隊影咗就肆無忌憚擺周刊，又影我屋企，呢樣我好唔想，心裏面係憤怒！依家我係有家庭嘅人，我希望喺屋企嘅生活係安寧同得到保護，唔同我自己一個人嘅時候，你影我冇所謂，但唔好再喺我屋企附近騷擾或偷影，希望大家明白。依家我心入面有陰影，唔想出去又要避。小朋友應該好健康，喺公園咪由得佢玩。我做呢行就多咗層擔心，唔希望佢曝光，放過我哋，畀我有健康嘅家庭，令小朋友健康成長。」
會祝福黎明
另外，提到有傳黎明有「新歡」女助手阿Wing，對方已懷孕6個月，城城稱有看報道，但不知道真或假，如果是真當然會送上祝福。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|