在單打獨鬥的環境中，她慶幸身邊有不少天使出現，其中一個是好朋友許廷鏗。他是欣宜入行的第一個好朋友，一度被指是拖友關係。在外地受腳傷，為怕影響對方工作情緒，兩人視像通話時，也沒敢第一時間通知他。
「當我心情好差，覺得個天好似要跌落嚟，或者好緊張，佢電話一到，就會無事，就會心情好靚，我覺得個天好公平，自己一個人喺香港生活，但係個天都派咗好多天使俾我。許廷鏗份人好善良，我哋可以係死對頭。我同佢同一年出道，同一間唱片公司，佢嘅宣傳費多啲，我嘅變相少啲，我多啲，佢自然少啲，兩個應該互鬥，但我哋都唔識，因為咁兩個friend咗。我受傷，佢當時喺馬來西亞拍嘢，要宣傳一首好輕快嘅歌，我唔想影響佢情緒，我個人就係咁，唔鍾意話俾人聽，直至做完手術先講俾大家聽。」
「所以你之前問我，有冇覺得自己單打獨鬥，初初入行頭幾年，我可以答你絕對係，因為我嘅性格會推開人，我好渴求獨立，由細到大都希望自己能夠撐起自己，可能因為好細嘅時候，我已經了解到因為父母關係，無論點做都好，都要用好大努力證明自己，細個好想證明俾大家睇，人大咗，發現只需要證明俾自己睇就足夠。」她說。
外間以為小時候萬千寵愛在一身，欣宜坦言不想令身邊人擔心，已經習慣不靠人。她愛搞氣氛逗人開心，甚至在病榻上，這病態舉動連她也自覺疲倦。
「細個開始，屋企人灌輸我一個概念，就係屋企人永遠都錫你，但始終有一日會離開你，到時就要自己照顧自己，細個發燒，可能係十一、二歲左右，想嗲吓婆婆同屋企人，佢哋嘅反應通常都係「做咩啫，病之嘛，好快會好番」，所以我比較鍾意扮無嘢，唔想影響人，整親腳之後，有同事打電話問候我，仲叫我唔好逞強，我收線後即刻爆喊。」她說。
推開人，同時又渴望別人的關心，欣宜自知矛盾不一的行為要處理。「任何關係，同事、屋企人、朋友、伴侶都好，都要學識去溝通，我份人好鍾意收埋，收得耐，積累得多就會爆出嚟。我覺得自己已經進步咗好多，每個人都有情緒，做藝人嘅責任係要娛樂大家，所以點樣平衡，搵一個健康方法釋放自己，第一件要做嘅係好好溝通。」她說。
後記:
肥姐08年離開，整整十年，欣宜直至在16年的《叱咤樂壇流行榜頒獎典禮》中，憑大熱《女神》攞獎，她覺得才是最適當時機，在台上公開感謝生命中最重要的母親，因不想外間說她消費父母。至於父親鄭少秋，要不是人家問及，她從來更加不會主動提起。
「話我消費屋企人係最hurt，因為屋企人就係屋企人，無得揀亦都真係無佢哋就無我，呢樣嘢係好真實。」
相關新聞:
入娛樂圈追夢 欣宜: 唔得我甘心返加拿大捧餐
http://bit.ly/2HZZOvN
屢被批評 欣宜接受自己:我為自己而活!
http://bit.ly/2F8VpZX
|
鍾意就快D Share啦！
|
|
|