古巨基將於5月11日至13日假紅館舉行 「泰和人壽呈獻《古巨基WE世界巡迴演唱會香港站特別版演唱會》」，已7年沒有在紅館開個唱，不少「基迷」引頸以待，基仔所屬的「英皇娛樂」更投資過百萬於紅隧為他買了大型廣告牌造勢。
早前基仔就為演唱會拍攝海報，幻化為時光戰士，騎上時光機，宣布會在演唱會上帶「基迷」穿梭時空，回顧從入行至今，經歷過的寶貴時光，暢遊古巨基音樂之旅。
唱晒廣東歌
眾所皆知基仔熱愛動漫，所以今次演唱會海報的時光機及時光戰士，都是經過他的構思，基仔說：「因為想帶出穿梭時光嘅演唱會主題，所以咪諗下不如騎時光機，或者坐喺一啲比較未來世界嘅機器上面。連影相件皮衣都特登磨爛到披口，配合返穿梭時空有過好多經歷嘅戰衣。」在拍攝期間，基仔覺得漫畫人物除了cool之外，通常都有少少搞笑細節，於是就諗不如貼塊膠布在鼻上面，他笑說：「戰士都係人，都會受傷咁解。」
基仔對上一次開個唱已經是7年前，等到歌迷頸都長，7年之癢，除了帶着時光機進紅館，跟大家集體回憶他的經典歌之外，當然會有很多驚喜給「基迷」，不過基仔話：「目前我只可以講，我今次會全部唱晒廣東歌！至於其他有咩驚喜就真係入場你先會知」
操Fit為咗着衫
經過一個歡樂農曆年，放肆大吃大喝之後，基仔謂自己的確增磅不少，所以他笑言當務之急就是減肥keep fit ，問到基仔有甚麼減肥秘笈？基仔說：「最近試緊番茄減肥法。就係一日三餐都係食番茄炒蛋。或者番茄加水煮蛋。我本身好鍾意食番茄，咁聽到話剩係食番茄炒蛋可以減肥，我咪試下囉，呢個咁簡單減肥餐食得好開心下，係有啲單調，不過我鍾意食個樣嘢，我可以日日食，食幾個月都唔厭。減咗幾多磅？呢個未知，因為我剛剛先開始咗幾日，遲下先話畀大家知呢個方法成唔成功。」
問到基仔會不會操肌於台上露下胸肌，基仔就笑謂：「台上露下胸肌，會呀，諗住叫班dancer露啦，我露極都唔會夠佢哋好睇㗎啦。我會操fit自己，係為咗着衫靚啲，唔係操fit 自己為咗唔着衫囉。哈哈。」
|
鍾意就快D Share啦！
|
|
|
