90年代歌手蔡興麟多得軟硬天師金曲《廣播道Fans殺人事件》一句歌詞，令他「被支持」了二十多年，蔡興麟名字在變得耳熟能詳。「神隱」二十年回歸香港樂壇的他將會出廣東唱片及開演唱會，他感謝軟硬「支持」，希望有機會合體演出，他說：「估唔到呢首歌令到大家記得蔡興麟。」
回歸樂壇反應勁好
在香港樂壇消聲匿迹二十年的蔡興麟最近回歸為無綫節目《流行經典50年》演出。多得軟硬天師金曲《廣播道Fans殺人事件》一句歌詞「蔡興麟我哋支持你」令他「被支持」了二十多年，蔡興麟的名字在大眾心目留下熟悉又陌生的印象。提起蔡興麟自然會想起陸家俊，網民期待兩人與軟硬合體，他笑說：「呢個Idea幾好，睇吓有冇機會合作，葛民輝以前都幾熟嘅，當時呢首歌推出我仲喺樂壇，當年公司都有同我講，首歌仲有提到好多人陸家俊、梁雁翎、黎明詩等等。估唔到呢首歌會令到大家仲記得蔡興麟個名，個樣就唔會記得，要上網搵搵。」
從未離開樂壇
蔡興麟回歸初時心情還十五十六，但出街發現不少觀眾還認得他，令他很驚訝，除了計劃再出廣東唱片及開演唱會，還決定未來投入一半時間留在香港。講到過去離港「神隱」二十年，他說：「大家以為我消失咗，其實一直喺呢行，只係重心喺內地、台灣、日本，今次係因為薛家燕邀請，同埋真係好掛住香港。近呢十年喺內地拍戲、拍劇、做演唱會，一路都冇忘記香港，只係冇啱嘅機會返嚟，今次見番好多舊朋友，覺得應該放多啲時間喺香港。」
對已故巨星好友念念不忘
香港最令蔡興麟念念不忘的三位故人是梅艷芳、張國榮、黃家駒，多年來他們的生忌、死忌，他也會在網上寫信給三位朋友悼念，十分有心，他說：「家駒係我入行認識嘅第一個藝人，《為了你，為了我》係佢寫畀我作為新人嘅禮物，同佢亦師亦友，我唔識樂器，佢教我四個Chord話可以走天涯，第一支結他係佢送。而張國榮好願意幫助新人，同佢飲咖啡佢會分享經驗。梅艷芳就好似姐姐，佢成日叫我小朋友，仲一齊合唱過。」蔡興麟又指每逢開演唱會，坐位會最前排會留空三個位悼念故友。
獨特保養方式
蔡興麟今次返港被讚「49歲」保養得宜，他笑說：「其實網上資料搞錯，我只係43歲，我17歲入行大家好易計到，唔緊要其實都係四十幾歲，哈哈。」蔡興麟自爆有一套吃辣椒養聲、養顏的方法，他說：「保養得唔錯可能同鍾意食辣椒有關，開騷我都會食辣椒開聲，聽講小鳳姐都係咁。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
