最佳男主角由印度紅星阿米爾汗(Aamir Khan)頒獎，全場歡呼。他恭喜一眾提名人，覺得佢哋拍得好好，希望可以合作，拍一啲能夠娛樂世界嘅電影。
得獎者係古天樂《殺破狼．貪狼》，全場歡呼，上台前華仔同成龍都有同佢攬攬。古天樂此番感言，令人反思，亦贏得全場掌聲。
古仔甫上台就做咗個「我終於得咗喇！」嘅表情，全場熱烈拍掌。有人嗌：「唔好喊呀！」然後古仔好淡定咁由袋裡拎咗張卡出嚟：「我係有準備講稿嘅！」眾歡呼。
「其實呢幾日好緊張0架，攞定唔攞呢？但我坐喺度，成晚，我發覺最緊要嘅係，我哋香港人，點樣做我哋香港電影。」全場又拍掌，氣氛同頭先黃秋生講香港電影時一片死寂好唔同。
古仔再說：「唔知呢？我由楚原叔攞終身成就獎嘅時候，我喺TVB，同我一齊拍戲。我坐喺前面嗰排，等緊埋位。當時我係一個演員。我問楚原叔，你做演員嘅時候，你係點樣拍好自己嘅戲呢？佢只係講咗一句說話，我用到今日。
「佢講嘅說話就係，記住，永遠，永遠，每一場戲，每一句對白，你唔好放棄。埋到位，再度，再度，再度。因為一部好嘅電影，係唔可以放棄嘅。
「到Pauline攞獎，我諗我哋依家香港好多電影從業員都識Pauline，Pauline喺我哋心目中，唔知呢，唔好講到頭先咁，係演員先識佢。佢喺成隊crew裡面，佢係一個開心果，好開心，佢帶俾我哋好多開心，唔係只係整XO醬嘅問題。」眾笑。
「我好想講嘅就係，我哋香港人今日一定要團結，我哋一定要做好香港電影。呢個係我好想講。」
最佳男主角候選名單：
鄭中基《大樂師．為愛配樂》
劉德華《拆彈專家》
田壯壯《相愛相親》
古天樂《殺破狼．貪狼》
凌文龍《黃金花》
|
鍾意就快D Share啦！
|
|
|
