唔聲唔聲突然嚇你一驚嘅李美慧，06年參選港姐（曾用藝名韋薇），喺《一擲千金》做過「千金小姐」，再入第21期藝訓班，較「矚目」嘅劇集係《少年四大名捕》同《Click入黃金屋》，曾離開無綫，前年再返去，簽基本藝人合約藝員，新作係《宮心計2深宮計》其中一個宮女。
本來《深宮計》焦點應該喺胡定欣黃心穎周秀娜等主角身上，但日前突然被傳媒踢爆李美慧同富商曾文豪結婚，令人大感錯愕，就連曾文豪二千金曾昭亮今晚到中環出席活動時，都話知道父親再婚一刻都覺得好突然。
咁啱套劇今日有宣傳，李美慧即成全場焦點。佢受訪時表示同曾文豪已經入紙登記，但未結婚。當問到佢同曾文豪年紀相差25年，李美慧只係笑笑口，話：「係呀…」佢話同曾文豪係朋友介紹認識，一切都發展得好順其自然。至於兩人拍拖幾耐？李美慧深呼吸一口氣：「拍咗都半年幾喇！」閃婚喎！
李美慧表示拍完《深宮計》就識咗曾文豪，又揚言識對方嗰陣係唔知未婚夫係富商。佢又話自己鍾意工作，希望婚後繼續做嘢，但佢都話曾文豪提出過叫佢唔好做藝員，李文慧話會尊重對方意見，會揀嘢做喎。
來源 source: http://hk.entertainment.appledaily.com
|
鍾意就快D Share啦！
|
|
|
