金庸武俠小說過去逾半世紀經常被中港台翻拍成電影同電視，好似《射鵰英雄傳》、《神雕俠侶》、《倚天屠龍記》同《鹿鼎記》等等，其中單係《倚天》，計埋近日大陸新電視版《倚天》，前前後後翻拍過11次（以張無忌為主角計算），最新出爐嘅，有大陸新版《倚天》。
呢個大陸版《倚天》，係第八次翻拍，之所以引起香港觀眾留意，係因為滅絕師太由周海媚飾演，而周海媚喺馬景濤版本嘅《倚天》，係飾演周芷若，依家「升呢」做咗佢師傅。
不過，如果講到歷年最神似最「滅絕」嘅滅絕師太，絕對係78年喺鄭少秋第一代電視版《倚天》演出嘅上官玉。雖然當年無論製作、攝影、特技、道具或者化妝方面較簡陋，但上官玉凌厲眼神再加上講說話鏘鏗有力，一出場已經成個氣場喺晒度，完全演活滅絕師太角色，好多場佢一場講對白，已經好壓場，例如光明頂叫周芷若用刀刺殺張無忌一幕，令人背脊都寒一寒。
年逾70嘅上官玉，原名梁秀珍，大家對佢較近期嘅印象，係「關鍵旅遊」結業。關鍵旅遊就係由上官玉同其前電視藝員關鍵丈夫1982年創辦，「旅行搵關鍵，招積出色舒適超級超值」，此歌絕對係一代人集體回憶。
60年代開始，上官玉先主力拍粵語長片，最初藝名「鶯鶯」，曾參演百齣電視劇同電影，當中粵語片佔多數，有功夫底子，舞台功架造詣不俗，曾與陳寶珠合拍《黑白飛天貓》，可惜總是主角緣薄。
及後上官玉加盟無綫，拍過不少劇集，包括《京華春夢》、《發現灣》、《女黑俠木蘭花》、《家變》同《義不容情》等等，多以尖酸刻薄、惡毒形象示人。但拍完91年電影《妖魔道》後，上官玉已經退出江湖冇再演出，至於同老公關鍵創辦嘅「關鍵旅遊」，亦已經喺2016年3月全線結業。
《蘋果》日前聯絡到上官玉，問佢對海味演滅絕師太有冇意見？上官玉話：「我冇意見呀，佢做梗係好」講到當年飾演嘅滅絕師太好經典，上官玉謙虛咁話：「我唔係，你哋睇啫，多謝你哋，我好普通啫。」會唔會認同滅絕師太係演藝生涯代表作，又或者係自己最中意嘅角色？上官玉稱：「我都冇所謂吖，有角色我咪做囉。」
問有冇興趣復出再拍戲時，佢語氣好肯定咁話：「冇喎，幾十歲重拍乜嘢！冇戲癮呀，呢啲係要有戲癮先至有個mood去做，我完全冇。」最後記者想邀約做專訪傾偈，可惜被上官玉婉拒。
講多少少關於上官玉嘅趣聞。1965年出道，仲喺百麗酒樓舉行記招，宣佈改藝名。當年絕非大家依家想像咁保守0架，仲係新人嘅佢，特登call晒記者去青山酒店，着間條泳衣俾大家影相。
1970年，上官玉與廣播界翹楚關鍵結婚，姊妹團包括鄧碧雲、羅蘭，關鍵就由楚原、周聰及許冠文陪同下迎接新娘，再去大會堂註冊。婚後粵語片亦開始式微，上官玉於是改投無綫拍劇。
|
鍾意就快D Share啦！
|
|
|
