劉美娟今日喺尖沙嘴宣傳新書《擁有失去》，趁著母親節推出，佢話喺電台工作之後，就開始構思出呢本書，受訪者包括張栢芝、歐陽震華、王祖藍等等嘅人生經歷。張栢芝一章除咗提及感情、婚姻之外，亦有提到其演藝事業。
栢芝憶述，當年拍《喜劇之王》，試鏡要見周星馳，星爺要求佢攞支筆扮點煙，當時栢芝見到枱面有包煙，就問：「點解唔俾我真嘅煙？橫掂我都食煙，直接啲。」當時星爺先是一呆，然後再隨栢芝意思做，當然最後取錄咗栢芝。
事後星爺有問栢芝當時點解有咁嘅反應，栢芝就反問：「若果我真係進入角色，唔通拎住支筆去演嗎？」劉美娟形容：栢芝就是如此率直敢言。
栢芝係單親媽媽，而父母亦喺佢9歲嗰年離婚（另文參見： https://bit.ly/2jLi2q3 ）栢芝話當年媽媽好想帶佢走，但爸爸唔同意，於是佢就將收喺床下底嘅曲奇餅罐拎出嚟，裡面收埋佢儲咗多年嘅幾萬蚊（時維1989年）。栢芝用紙包住啲錢塞畀媽媽，又寫咗字條，內容大意叫媽媽好好生活、有機會嘅時候先至帶佢走。至今栢芝媽仲保留張字條。
栢芝又表明，一定會再婚，但唔係為咗兩個仔，而係為咗佢自己，因為佢從來都冇放棄過愛情，自言依家仲好似十幾歲女仔咁，相信愛情。
另外栢芝都有講教仔法，自言身教好重要，好似有次栢芝教Lucas溜冰，Lucas怕跌倒，挫敗同丟臉，不肯嘗試，於是佢刻意喺囝囝面前一再跌倒，甚至跌得瘀晒，要俾Lucas知道，跌倒唔緊要，重新爬起來就是了。劉美娟坦言欣賞栢芝，能夠喺別人眼中最痛苦嘅事，重新搵到真正嘅自己。
至於歐陽震華（Bobby），劉美娟同佢真係老友鬼鬼，入行拍劇集《薛剛反唐》同Bobby結緣，至後期拍《壹號皇庭》成老友，而呢個劇亦係Bobby事業嘅轉捩點。
Bobby喺書中憶述，佢出道時，英俊小生當道（其實任何時候都係0架喎…），佢係「最醜樣」一個，演的不是反派就是死屍，但演得多都熟能生巧，如擘大眼死、半閉眼死、抽搐中死、臉俯伏地下死、臉朝天死等等，全部都難唔到佢。Bobby仲試過為演好死屍角色，吸一大口氣然後閉氣兩分鐘，讓胸口平靜落嚟，避免捱駡。
拍《壹號皇庭》令Bobby事業有起色，因為當時佢已經喺電視台演二三線角色十幾年，打算再唔成功，就轉行重頭開始，事關當時有間服裝連鎖店經常喺電視廣告招聘員工，月薪比佢喺電視台人工仲高，如果佢喺服裝店做10年，話唔定已擢升為店長喇。
|
鍾意就快D Share啦！
|
|
|
