之前古天樂、古巨基、吳家樂、劉愷威喺網上晒「新五虎」合照，點知四缺一，喺網上「集氣」calling何遠恒，噚晚一齊現身古巨基紅館個唱，「TVB新五虎」古天樂、吳家樂、劉愷威及何遠恒做嘉賓，與基仔合唱《當年情》，拎番一張舊相，扮番以前個pose嚟影相。
基仔喺介紹嘉賓時就話：「今日好難得，上次約得四個差一個，今日幾經辛苦搵齊五個。」然後「四虎」升上台，基仔日前唔小心跌落台，噚晚古仔上台細心叫三位兄弟企前少少，古仔解釋：「呢個係案發現場位，大家係咪企前少少安全啲。」點知基仔笑笑口講：「案發現場就係企前呢個位啦，反而係企番後少少安全。」古仔望一望基仔就話：「哈！你都好嘢，咁都冇事，堅挺即係堅挺。」基仔笑言「我巨肌嚟！」古仔笑基仔落台個吓靠條巨肌撐一撐，基仔搞鬼講：「我動L咁彈番轉頭，哈哈哈……」吳家樂就意有所指：「唔怪得Lorraine(古太)跟你咁多年」
到何遠恆講基仔係一個好男人，古仔笑笑口窒何遠恆：「我最近睇新聞，你同個咩彩華散咗，係咪嗰晚我哋約食飯，你冇出現，去咗滾，所以散呀？」何遠恆即耍手擰頭：「唔好講呢啲啦。」
到劉凱威講基仔，佢就話:「基仔成日好濕，總之好濕啦。」觀眾狂笑，因為fans都知基仔一向大汗，四虎問觀眾想聽咩歌，觀眾大叫古仔嗰兩首歌《男朋友》或《今期流行》，現場響起《今期流行》音樂，古仔聽到之後，即指住控制台監制錢國偉，古仔話：「肥仔，你唔係真係玩嘢呀？」何遠恆同吳家樂就隨住音樂大跳古仔當年「拜神舞」，古仔求大家放佢一馬：「唱歌可以唱，但舞就唔好迫我跳我拜神拜左咁多年，唔好搞我啦!」之後基仔出嚟，與四虎一齊唱住《我愛毛查查》兼同觀眾握手。
1995年無綫以「新五虎」之名，力捧古天樂、古巨基、吳家樂、劉愷威及何遠恒。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
