「亞視永恒」又傳冇銀要吊鹽水！回魂僅95日的亞視，昨忽然傳出管理層大地震，據本報收到消息，導火線是亞視老闆閂水喉，有員工爆料指大批無綫舊人過檔開台，跟亞視前朝舊臣出現派系問題，亞視現搵外行人新管理層執拾爛攤子，身為CEO的吳雨死撐：「我不嬲係顧問。」
借OTT還魂的亞洲電視今年1月重新開台，請來陳志雲、王喜、曾華倩、朱慧珊、劉錫賢、樂瞳等助陣做節目，還有大批無綫和亞視舊員工。然而，開台僅95日，昨亞視傳出大地震，CEO吳雨和營運總監區偉林均轉做顧問，製作總監林嘉穎去年以私人理由已請辭。據知原因是亞視老闆拒再揼水，有亞視員工向本報爆料，無綫舊人和亞視舊人雙方合作上出現問題，影響士氣，據知亞視覓得新管理層接手，不過全部都是外行人。
就亞視大地震傳聞，高層吳雨、區偉林和曾醒明昨午到尖沙嘴見傳媒，吳雨表示：「簡單有兩點，第一點係話公司閂水喉，冇錢；第二就係話我哋要轉做顧問。其實由頭到尾，我哋簽嘅合約，都係話我哋係做高級顧問，負責幫公司籌備、策劃開台同組班底，一啲行政架構。」吳雨聲稱因「高級顧問」銜頭難以辦事，故他和區偉林改成「行政總裁」和「營運總監」。
要發展海外項目
吳雨強調開台至今三個月一切上軌道，行政亦健全：「老闆要我哋去發展海外project，例如馬六甲、星馬市場，因為我哋已經分身不暇，所以轉番去做提供意見。」吳雨死撐並非人事變動：「我不嬲都係顧問嚟，我仲做多咗㖭，我返足工㗎。」他指林嘉穎則因身體問題辭職，並否認亞視閂水喉及裁員：「老闆用百億投資其他項目，亞視係乜嘢呀？其實老闆心目中都有打算，遲吓都會投資拍劇。」
吳雨指亞視管理層之前是協盛協豐，現在則是亞視控股有限公司，他指新加入一定不會是圈外人，否認「外行領導內行」之說。提到有員工爆料稱無綫和亞視舊人合作出問題，吳雨堅稱：「唔會，都係我悉心去組織，樂視、nowTV同Cable，五台集中，百花齊放，其實做嘢都好開心，問我呢，其實100%都未算做到最好。」
志雲：功成身退
為亞視主持《百萬富翁》節目的陳志雲昨接受電話訪問，他說：「我唔會用『大地震』去形容亞視呢個變動，因為用『大地震』好似好負面，我會話吳雨同區偉林係功成身退。OTT係一個好新嘅營運模式，所以亞視想檢討用新嘅辦法去做，唔會係一件好驚訝嘅事，甚至係負面嘅事，最緊要係有啲新嘅變動，有人繼續投資，為香港嘅觀眾提供更多選擇。」主持《今晚夜》的王喜指節目如常，另一位主持樂瞳則說：「我呢啲小小藝員按本子辦事，高層啲嘢我又點會知，哈哈。」陳彥行亦稱：「大老闆講過，放心，一定有糧出！」
亞視一姐朱慧珊則說：「無論有任何變動對我都無影響，希望亞視越變越好，對亞視來說變幻原是永恒。」亞視舊將劉錫賢表示：「冇影響，工作照做，不過真係唔知道係咪同風水有關，入咗大埔之後就咁多風雨！」
採訪：羅慧敏、魯吉、陳杰、唐心悠
攝影：沈健程
|
鍾意就快D Share啦！
|
|
|