一代才女林燕妮逝世，身為其好友兼香港著名時裝設計師劉培基（Eddie），接受東網訪問時，難掩悲痛之情，他說：「好難過，難過係必定，人生無常，一聲唏噓。年紀大真係冇辦法，係好難過嘅。」
最近一次見面兩年前
Eddie坦言之前對林燕妮有病並不知情，直言有一、兩年冇見面，對方曾邀約他到桂林旅遊，但最後因自己健康問題故未有成行。他說：「對上嗰次係兩年前見佢，大家依家都好少出街，我都唔知佢個病咁嚴重。（佢係報喜不報憂嘅人？）去到我哋呢個年紀，身體有事都唔會講，呢啲都係畀醫生去治療，唔會要朋友擔心。」問到林燕妮生前有否與他談過對生死的睇法？他說：「有，幾年前都佢傾過，佢話佢自己識解決，對生死睇得冇所謂，係人生必經階段，要發生就要發生。」
「你有冇煙仔？」
講到與林燕妮生前點滴，Eddie表示有太多太多，只希望她開開心心：「佢肺癌可能同佢食煙關係，因佢係食得好多，但動作好優雅好斯文。我就戒咗，不過冇叫佢戒，我同佢乜都傾，佢對我好好，對我好嘅朋友入面，佢都算係前三名，我哋一齊成長，雖然好少見面，但係一齊經歷好多嘢。」他直言首次見林燕妮，也是跟香煙有關，當年自己在英國讀書後返港經營時裝事業，林燕妮經朋友介紹下，雙方交流時裝經，初見面時，林燕妮第一句跟他說的話：「你有冇煙仔？」由於他只答香煙放在桌上，要林燕妮自行索取，故事後林燕妮認為他為人十分特別。
自言獲林燕妮給予不少幫助的劉培基，說到當中最深刻的，是1979年他在巴黎搞時裝展覽，惟銷情不濟，有次林燕妮和黃霑約他出來吃飯，他說：「當時生意真係差到不得了，心情低落。食完飯，林燕妮走到我身邊，細細聲喺我耳邊講：『有咩事我可以幫你，你需唔需要我畀廿萬你？我可以幫你。』以1979年嚟講，廿萬算係一筆唔少嘅數目，不過我最後冇要到呢筆錢，但到依家我都好深刻記得。」
至於會否和林燕妮的家人聯絡籌備喪事，Eddie說：「佢嘅小朋友應該希望低調處理。」
|
鍾意就快D Share啦！
|
|
|
