一代才女林燕妮離世，震驚圈中好友，相交多年的劉培基接受《蘋果》電話訪問表示：「唉！又走一個朋友，冇辦法，希望佢唔好辛苦！」問到最後一面見面？劉培基說：「都有一、兩年，佢約我去桂林，佢話桂林好好玩好靚，佢喺嗰度識好多朋友，我話好多年前去過，自己身體唔係咁好，有機會再一齊去。冇辦法，當時點會知道佢身體唔好。」
問到林燕妮姐姐生前有否透露患癌？劉培基說：「呢啲事佢唔講啩，好多人到我哋咁經歷，大家都唔出聲，第一朋友幫唔到，知道又會擔心。」談到林燕妮姐姐的為人，他說：「佢活喺童話世界裡面，好浪漫，寫好多散文，一個對愛恨好分明嘅人，為咗愛，佢可以做好多嘢，但恨又好相當。」問到是否因為舊愛黃霑？劉培基表示：「呢個我唔想講，已經咁多年。總之佢為人愛恨好分明，但對定錯最緊要佢自己覺得，呢啲我哋唔能夠批評，佢係一個極好嘅人，可能經歷太多。」
對於林燕妮因肺癌離世，他嘆說：「係咪因為食煙呢？佢食煙食得好犀利，食得嚟又好自然，我戒煙好多年，佢好佩服我戒得成煙，因為呢班朋友裡面，我算食煙好犀利，一日食三包，佢都食唔停。我第一次識佢就係煙仔，當年我喺英國讀完書返嚟，佢經朋友介紹嚟我度買衫，有人撳鐘我開門，林燕妮、陳家瑛、容朱迪三個一齊嚟，大家喺度試衫，我又同佢唔熟，佢問我有冇煙仔？我話有，喺枱度，叫佢自己攞，佢就自己攞。後嚟佢同人講，未見過咁嘅人，問你攞煙仔梗係攞畀人，佢（劉）郁都唔郁，叫自己攞。佢就覺得我好特別，人哋幫襯你，問你攞煙，你叫佢自己攞。」
聽到林燕妮離世消息，劉培基坦言很難過，對於林氏四兄弟姐妹都是癌病離世，他說：「唔知係咪遺傳，梗係唏噓，極難過！」
|
鍾意就快D Share啦！
|
|
|
