大陸爆紅選秀節目《中國新歌聲》第三季於昨日（21日）舉行記者會，男神導師團謝霆鋒、周杰倫、庾澄慶同李健首次齊腳登場。霆鋒更係節目播映以來最年輕嘅導師，記者會上「後輩」霆鋒更向「前輩」好友周杰倫送上港式鴛鴦絲襪奶茶，認真有心。
《中國新歌聲》已經進行到第三季，新一季除咗換上全新啟動嘅「魔鏡」轉椅，仲採取全新battle賽制，即係每位導師可以不受數量限制地爭搶學員，而一旦戰隊滿員，battle搶位賽制即刻開啟。每當有新學員被選入已經滿員嘅戰隊，呢名新學員將主動發起battle，選擇戰隊任何一名學員發起挑戰。每一次battle都意味住戰隊構成重新洗牌嘅可能。
導師庾澄慶係「兩朝元老」、周杰倫更加係「三朝元老」，佢哋都覺得新加入嘅謝霆鋒係比賽期間，會靠殺食靚仔樣搶選手，霆鋒就話佢嘅存在一定會為導師們帶嚟好多衝擊感，仲講笑話：「讓一些已經坐了幾年又沒有贏過的導師更有拼勁。」由於係「新丁」加上係節目史上最年輕導師，作為「後輩」嘅霆鋒當然識做，於昨日舉行嘅記者會上，向「三朝元老」周杰倫送上「見面禮」－ 港式鴛鴦絲襪奶茶，周杰倫接過奶茶後，霆鋒就話：「喝下這杯奶茶，麻煩你等明年再拿冠軍吧！」不過周杰倫乾脆拒絕：「我收下，但是我先不喝！」而喺隔離嘅庾澄慶就乘機抽水，「這是忘情奶茶！等十月錄製完成了再喝！裏面的珍珠也變石頭了。」
另外，關於霆鋒喜好嘅音樂風格，佢就話：「喜歡反差大、爆發力強的選手，並不一定要固定為某種風格，想找一批代表中國音樂未來的歌手。」
來源 source: http://nextplus.nextmedia.com
|
鍾意就快D Share啦！
|
|
|
