蔡思貝由選港姐出道到依家，令佢心煩嘅新聞未停過，幸好有家人鼓勵，特別係媽咪。
噚日，蔡媽媽又出動，不過今次係「湊女放學」。同行仲有蔡爸爸添。
噚日蔡思貝同龔慈恩個女林愷玲等，到銅鑼灣出席商場活動，同場仲有巴西體操界靚仔Arthur Nory。蔡思貝雙親都有來捧場撐愛女。完騷之後，蔡思貝先去換番自己衫，爸爸就負責截的士。當時落緊傾盤大雨，好彩都截到車咋。蔡思貝仲有班fans護送上車。走嗰陣蔡Baby當然有同fans say byebye，雙親都有同fans吹下水咁。
之後蔡家三口去到北角七姊妹道落車，入咗一幢大廈。問蔡思貝係咪返屋企？佢話「係呀！」跟住就匆匆入內。未幾蔡家三口又出動，先去銀行櫃員機提款，途中遇到伯伯街坊，有傾有講，期間街坊問佢哋：「搬咗嚟呢度呀？」蔡家答：「係呀係呀！」當時雨勢頗大，但四人都雞啄唔斷傾咗成五分鐘左右。蔡思貝仲好乖咁，扶一扶個伯伯。
拎完錢，蔡家三口又去截的士，不過今次係蔡爸蔡媽送個女上車去灣仔學唱歌。學咗個幾鐘，雨仲未停，於是蔡思貝又截的士走返屋企喇！
究竟點解蔡思貝喺咁難截車嘅天氣下仲堅持要搭的士？需知蔡思貝呢個新牌仔（兩年幾左右），但佢嘅「戰績」都幾厚，自認「賽車貝」……正確應該係「馬路炸彈」，多次被發現觸犯交通條例兼撞車，曾經邊揸車邊拿手機伸出車外影相，又試過揸住佢架甲蟲車仔，由金鐘紅棉道駛去灣仔，原本只可直路駛去告士打道，但蔡思貝喺燈位突然轉右，鄰線直行嘅的士收掣，被攔腰撞到。
刮花車身撞凹車門對蔡思貝嚟講已經係家常便飯。未知係咪已經扣晒分被停牌，定係佢本人「自動停牌」，所以依家要「的出的入」囉。
做個明智嘅道路使用者——唔識揸，就做乘客
|
鍾意就快D Share啦！
|
|
|
