【《蘋果》專訪】入行70年的秦沛（Paul哥），昨日踏入74歲，仍未言退的他，將於下月參與舞台劇《奪命証人》演出。「做咗70年，演舞台劇唔係做乜紀錄，畀自己一個成就感，滿足自己，拍咗70年電影，如果有一日離開演藝界，好似爭咁啲嘢，嗰樣叫舞台劇，所以呢個係我應承做嘅原因。」
| | |
「呢兩年睇唔到錢」
Paul哥近年明顯減產，對上一部電影是《春嬌救志明》。說起港產片不振，他說：「好難過囉！冇得講啦，市場嘅問題，時代變咗，市場越來越少，競爭大咗，心裏面都幾難過。如果冇記錯，香港最盛況時候，一年300幾部電影，𠵱家每年幾十部，差好遠，喺度掙扎緊。資訊越發達，我哋越辛苦，冇乜辦法。」以前Paul哥曾經講過，接戲不是睇錢就是睇劇本，Paul哥坦言：「我唔睇錢㗎喇，最近呢兩年根本睇唔到錢，睇錢嘔㗎。喺內地嗰啲，一部戲係好多好多萬喎，唔好睇故事係乜、做乜角色、導演熟唔熟、老闆係邊個，錢都係嗰啲錢，差太遠喇。」
在娛樂圈長大的Paul哥，這行對他別具意義：「做戲唔係我嘅工作，係我事業，我爸媽係演員，兩個細佬係演員，細佬嘅太太係演員。我同人講笑，唔單止係家咁簡單，今日秦沛我，有好多好多老婆喎！我有好多好多仔女喎！幾個都好犀利，劉德華、郭富城、周迅、胡杏兒、鍾嘉欣全部都有名。」
「自己做老竇麻麻」
Paul哥在戲裏演盡慈父角色，但現實中父親卻早逝。童年缺少父愛，令Paul哥引以為憾。「我6歲囉，爸爸走咗，好辛苦。我11歲，阿媽嫁畀爾冬陞老竇。繼父好嚴肅，一個幾嚴厲嘅爸爸，相處唔係好多年，佢都走埋。」那如何演繹各種「慈父」神髓？他說：「揣摩出嚟，睇人哋老竇點樣做，但自己做老竇就麻麻哋，好少機會陪佢哋成長，呢樣係比較遺憾。」
採訪：余燕儀
場地提供：DADA Bar+ Lounge of THE LUXE MANOR
|
鍾意就快D Share啦！
|
|
|
