話說剛過去的週末，跑馬地馬場舉行「2018亞布力青年論壇創新年會」，有現已貴為政協副主席嘅前特首梁振英、亞布力青年企業家論壇名譽主席，前中國證監會主席劉明康，貿發局主席羅康瑞等政經名人出席，但係呢個表面睇落普通不過嘅強國論壇，竟然發生咗一段令香港傳媒O晒嘴嘅插曲。
事緣當日出席採訪嘅傳媒機構代表，到場先發現須要簽一份聲明書，同意五點要求方可入場採訪，但係五點內容條條辛辣，甚至可謂創香港傳媒史「先河」：包括申明大會指定活動不開放予傳媒採訪；要求傳媒不採訪、不報道劉明康當天活動；不准引用工作人員私人微博、微信等內容報道，以至不准在指定範圍外採訪。
至於最辣的莫過於是第三條：任何形式報道須先經大會審批方可發布，另若直播期間有嘉賓講錯嘢，須協助大會處理修正、刪除、澄清云云。
嘩﹗雖云香港回歸祖國將近廿一年，但傳媒同業幾時被同化、被「大陸化」到要被審稿、被修正、採訪被施加諸多限制？香港絕大多數新聞工作者仍然堅守「新聞自由」和「編輯自主」底線，寸步不讓。據《壹》仔所了解，當時喺現場嘅大多數本地主流媒體嘅同業朋友都冇屈服，寧願唔入場採訪都拒絕簽署呢份「喪權辱媒」嘅聲明，所以往後嘅報章、電視同電台新聞，對於呢次論壇嘅內容都着墨唔多，最多變成報道「聲明書事件」。
然而，身為大會嘉賓嘅689，喺呢個冇本地傳媒採訪嘅論壇上，似乎就冇做過嘢為港媒維權喇。事關《壹》仔睇返佢同日傍晚先喺自己嘅facebook貼出在大會講稿，佢致辭時只係陳腔濫調，一味硬銷大灣區，又話歡迎內地青年來港交流：「我尤其歡迎中國內地的青年朋友們來到香港，和香港青年交流，進一步增進兩地青年的情感溝通和認同。」
當然，難怪689如此冷漠，皆因近排轉型做鍵盤戰士嘅佢，除在閒時寫吓文罵民主派、罵《壹傳媒》，吹捧「一帶一路」同「大灣區」之外，仲曾經撰文貶低新聞自由重要性：「新聞自由和表達意見自由，以至言論自由和學術自由等都是普世價値，但不是絕對價値。」哦明白晒，新聞自由在他的眼中，大概都重要唔過大灣區同一帶一路！
撰文：巫不言
立即按此連結下載APP：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
