大台劇《飛虎之潛行極戰》於內地網上平台的點擊率早已突破30億，成績相當之好。不過叫座唔一定叫好，事關昨晚播出的第14集有O記、飛虎火拼泰國販毒集團的情節，只不過呢短短5分鐘的戲已經有好多反駁位、甩漏位，學網民話齋：「究竟嗰廿幾點收視邊到嚟？」
首先，班毒販拎住機槍係咁射，但警方無個中槍，反而拎住把手槍仔嘅警方就下下打中班毒販。另外，槍林彈雨之間啲射擊聲呯呤嘭唥密密麻麻，但啲車就得幾個窿仔，好似有啲唔啱數喎。
子彈窿都算，最大問題係手榴彈炸到架車飛起，嚟咗個高難度360度翻體順利落地拎埋滿分，但睇真啲架車，莫講話無炸到甩轆、爆埋車頭蓋呀，就連少少花都無架。除咗架車炸完無事，幫毒販一樣喺船上丟手榴彈，架船一樣係無穿無爛，勁！
至於有網民指飛虎喺駁火情況之下選擇游繩降落唔合理，仲要咁大個目標半天吊班毒販都射佢哋唔中，只能夠話算罷啦六師弟，集中精力睇Jeana何佩瑜出水騷胸半露好過啦。話時話，呢幕Jeana游向吳卓羲前的連串動作，即係深呼吸一啖氣，再摙住個鼻沉入水然後先開始游，擺明就係action前嘅預備動作，乜咁唔小心睇漏眼無cut走呀？
來源 source: http://nextplus.nextmedia.com
|
鍾意就快D Share啦！
|
|
|
