53歲藝人韋家雄，經歷過失婚失戀，五年前因拍無綫劇《金枝慾孽貳》與劇中飾演「春琳嬤嬤」的陳嘉嘉分手後，於今年元旦終於搵到真愛鄧楚雅（Keynes），對方比他年輕近廿年、任職銀行，拍拖數月因甚為投緣，決定閃婚，已定於今年十月六日大排筵席註冊結婚。
入行廿九年的韋家雄出身亞視訓練班，哥哥韋家輝雖是出名的監製，代表作多不勝數，包括《大時代》和《義不容情》等，但他未有叨哥哥的光，沒有參演過對方的劇，後來做過生意卻多次失敗，投身無綫後，一直演戇直、敦厚的角色，之前在《金》劇演小太監備受關注，今次在《宮心計2深宮計》中演公公「成內侍」，與「南宮司設」康華有一段神交的「對食」演出，更Man爆與康華上演一段「壁咚」戲，成網民熱話。
被女友心思感動
二人因合作無間而成為「好兄弟」，家雄「小登科」，康華當然要重槌出擊，準備豪花五位數字買金飾作賀禮。日前他們現身金飾店，見康華如兄弟般向家雄搭晒膊頭跑去揀金飾，但亦不及其後到場的Keynes搶鏡，一對新人一見面便Sweet爆手拖手，猶如剛拍拖的戀人般熱情，「三人行」出巡商場，逛完商場便到餐廳醫肚，家雄細心為女友揀美食，期間吸引不少Fans駐足觀看及邀請合照，場面熱鬧。
其實家雄能夠左擁Keynes右抱康華，都是憑其三寸不爛之舌，以搞Gag能手冧掂不少女生，身邊不少共事的同事，都讚賞他是一名「暖男」，又愛說笑話氹身邊人，人緣極好。他昨日受訪時謙稱：「其實我冇乜氹女秘技，只係做番自己，真誠對朋友！」又稱沒有用冧功氹未來老婆，反之Keynes施予無限愛心，親手縫製銀包、皮帶和造生日蛋糕送贈，成功令曾失婚失戀而對愛情灰心的他再燃愛火：「佢係一個不拘小節嘅人，我哋性格好夾，相處開心，咪一齊囉！佢好有心思，親手造好多嘢送畀我，呢份心先最珍貴，我好感動！」
囝囝與「媽媽」隊啤
家雄與第一任妻子所生的兒子，如今已廿多歲，他稱兒子予以祝福，並與「未來媽媽」相處融洽，相當感恩。問兒子與Keynes夾得嚟？他說：「佢兩個都好夾，我哋一齊飲啤酒，我個仔又帶埋佢女友出嚟，我哋一家四口一齊食飯好開心，我今次再婚，我個仔都好支持，仲祝福我添！」
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|