杜汶澤輸得好大鑊咁喎！（美聯社）
世界盃16強開波，第一日就有兩大球王阿根廷美斯同葡萄牙C朗分別作賽，開波前相信好多人都會諗，點都會有一位球王殺入8強啩！點知世事無絕對，兩位球王齊齊出局，可以join埋一齊搭飛機離開俄羅斯。唔少鍾意睇波嘅明星都話勁失望，當中最爆嘅要數杜汶澤，佢喺社交網話當年好支持阿根廷，自從馬納當拿退役佢都冇乜點樣再睇波，點知尋晚飲大咗將成副身家（即係公司所有伙計嘅成個月人工）買咗阿根廷贏，結果當然係輸咗佢仲宣報暫停出糧直到另行通知，講到咁佢真係輸好多喎！不過唔出糧屬犯法行為，相信杜汶澤都係講吓笑啫。
而前體育主播伍家謙睇到阿根廷輸波，佢就喺社交網將容祖兒首《16號愛人》嘅歌詞改咗，狂寸阿根廷入唔到8強。作為明星足球隊其中一員嘅衛志豪嬲到震，狂插阿根廷輸波都係因為美斯，成場波頭耷耷冇神冇氣想唔輸都難。
相比起美斯，C朗都係輸波但係網上冇乜人鬧佢，好似陳司瀚咁，佢喺社交網留言話雖然輸咗但係打得好，仲會繼續支持咁話。要數「燈」力最強都算得上係前日本AV女優蒼井空，賽前話要支持美斯同C朗，結果兩位球王都畀佢「祝福」到出局，唔少網民都留言話今次真係「多謝」晒佢。
----------------------------
東網巨星開咗ig喇，大家快啲follow
https://bit.ly/2JjSVcr
來源 source: http://hk.on.cc
|
鍾意就快D Share啦！
|
|
|