【《蘋果》專訪】
張錦程90年代中開始在無綫拍攝多部劇集，甚為好戲的他卻從未擔正，意興闌珊下離巢到內地發展。離無綫後，在04年迎娶曾被無綫力捧的張延，翌年誕下囡囡張耕夢；雖然兩人被視「美女與野獸」組合，但張延眼中老公又型又有才華。日前一家三口接受《蘋果》專訪，張延大爆錦程寄錄音帶教她主持技巧：「佢最吸引我一樣嘢，係佢把聲。」
現年52歲的張錦程90年代中至00年代初在無綫拍攝多部經典劇集，不過他在無綫最大得着，或許不是成功入屋，而是認識現在的太太張延。現年48歲的張延在93年以華南理工學員身份到無綫實習，因為樣貌甜美備受力捧，短短年半時間就拍過《生死訟》、《笑看風雲》和《刑事偵緝檔案》等十五部劇集，約滿後離開香港娛樂圈，回內地發展。
| | |
重遇教睇劇本
久違的張延，日前與老公張錦程及13歲囡囡張耕夢一家三口接受本報專訪。張延在96年以部頭形式在上海為無綫拍《繞着神州走》，兩人因而認識，原來錦程當時已對女方嗒晒糖。張延笑說：「我哋成組人喺街邊食嘢，收錢收我係正常，收佢就收多咗，我就出聲。」錦程大讚老婆：「呢個女仔好有義氣，幫我哋爭取，唔想我哋俾人呃。」
分道揚鑣後，錦程為張延送上錄音帶，教伊人主持技巧，張延冧爆說：「佢最吸引我一樣嘢，係佢把聲，拍完《繞》之後，大家分開咗，有日突然收到錄音帶，佢教我點做主持人，反而留低深刻印象，呢個人把聲好靚，好好聽。」錦程解釋張延在內地做主持，由於自己曾在商台接受DJ訓練，所以將自己的技巧透過錄音帶教授對方。這樣大獻殷勤是另有居心？錦程哈哈大笑：「梗係啦，錄埋帶，唔通白做咩！」
不少人好奇美女為何愛上野獸，原來是因為錦程的貼心，張延笑說：「我識佢嗰時已經唔覺得佢係靚仔，但佢有才華！好欣賞佢，好難得有個人溝通做戲嘅嘢，嗰時喺橫店拍劇再遇番佢，好多時唔明劇本點解，佢幫我睇，慢慢我代入咗，覺得佢好特別。」由初次合作互有好感，到分道揚鑣送錄音帶後再在橫店拍劇碰上，證明兩人確實有緣。於是乎，錦程當上張延經理人，再於04年再做她的長期飯票。
張延當年在無綫實習期間，記者曾聽過不少藝員排斥，認為她們是廉價勞工搶飯碗，但張延說沒留意：「我又唔知喎，嗰時我做嘢冇乜理到。」短短兩年，張延又劇又綜藝節目，拍到冇停手：「我記得嗰兩年我冇休息過，新人吖嘛，有得開工幾開心㗎。」
再拍港劇隨緣
張延95年跟無綫約滿後，受港府修訂外勞政策影響來港工作批文，惟有返回內地發展。可想回歸香港電視？張延笑着說：「如果有我都開心㗎。」錦程則言，當年太太誕下囡囡後，曾希望留港拍劇，以便有更多時間照顧囡囡，但他就向老婆分析：「我同佢講，如果拍TVB，你係冇得瞓，你返到嚟都係沖個涼，瞓幾個鐘就走，基本上你都係見唔到阿女，阿女一醒咗媽咪就已經去咗開工，每日都係咁，咁咪唔好囉，所以計番我哋𠵱家喺內地開工都好，拍完返嚟有整段時間休息，所以我哋兩個都隨緣啦。」
採訪：戴彩煥
場地提供：金蘭花泰國菜館
|
鍾意就快D Share啦！
|
|
|
