過咗個世界盃，由謝霆鋒任嘉賓主持嘅ViuTV節目《鋒味前奏》又番嚟聽日（21日）播出嘅一集霆鋒同主持火火繼續一邊整嘢食一邊傾吓「少男心事」。以往咁多集，霆鋒都只需要廚房入面工作枱嘅一小部份，不過今次就要清空晒成張工作枱，原來係由零開始去整麵條。
火火問霆鋒拍咗咁多年戲，邊一次拍攝經驗係最難忘。霆鋒諗都唔使諗，就話係佢17歲時拍第一部電影《新古惑仔之少年激鬥篇》，其中一場『劈友』戲，「同劉偉強傾傾吓偈，突然間發現我對白飯魚，成對都係紅色，一拎出嚟就係半隻鞋咁倒血，原來開咗個腳眼，跟住導演話：『唔拍入去醫院！快啲！去！』你知啦，年少氣盛的我，再加上有啲責任感嘅，嘻嘻，就話冇事，我繼續拍。跟住我哋兩個喺度嗌交，我話：『冇事！繼續拍！幫我洗傷口！』幫我洗傷口嗰位工作人員喺地下執咗隻拖鞋，叫我咬住。我想嗌唔好，跟住佢兜頭就冚咗我一巴，話：『咬住佢!』 一洗完傷口，其實已經見到白色嘅骨，跟住用大力膠布紮實大髀，紮到唔流血，然後繼續拍打戲，五個零鐘之後就入咗醫院。」
故事仲未完，去到醫院先到戲肉，「縫針前醫生同我講：『靚仔，嗱，我哋同你縫，唔代表你身體係冇破傷風菌，如果有嘅話，我哋要幫你斬咗隻腳，或者會有人命嘅危險。』縫到最尾嗰針，我同佢講：『我乜都試過喎，縫針就未試過，不如你俾我自己縫吖。』哈哈哈，跟住佢望一望我，又望一望我隻腳，覺得：「唉！真係冇得救呀你！」哈哈。聽到呢度，火火都即刻話：「我而家聽番都真係覺得你冇得救呀！」
講吓講吓，話咁快啲麵條已經整好，呢個時候，霆鋒就拎出衣架俾火火，將麵條掛起，唔知係咪因為之前佢用衣架掛麵而引起一時熱話，所以霆鋒就話：「我啱啱同一個意大利名廚比賽，我問佢：『How do you hang your pasta？（你點樣掛你嘅麵？）』佢話用佢掃把支棍，所以 我哋真係唔好未見過嘅就笑啦，其實呢個係一個最傳統嘅方法嚟㗎。」然後就有啲無奈咁話：「成個意大利都係咁㗎，唔好傻啦。」
請參與壹週刊大獎賞活動！有機會贏取郵輪假期 、名牌腕錶、4K超高清電視或金箔護膚品，仲有機會同陶傑共晉晚餐添！
即按：http://bit.ly/Appinstall18
來源 source: http://nextplus.nextmedia.com
|
鍾意就快D Share啦！
|
|
|