鄭嘉穎同陳凱琳拍拖三年，之前成日俾人見到佢哋戴情侶帽行街，有傳兩人即將拉埋天窗，於外地舉行婚禮，只係宴請小量朋友出席。據知突然由情侶升呢成夫婦，原因係有咗愛情結晶品，陳凱琳仲即係停工o添。
呢一個停工模式，已經唔係新鮮事，當年陳豪同女友陳茵媺拍拖，陳茵媺都係突然停工，再變成幸福少奶奶，依家已經變咗一家五口喇。
13年時，傳出陳豪以3千萬現買入大埔獨立屋築愛巢，同時，陳茵媺以返加拿大探父母為由，推咗武俠劇《寒山潛龍》拍攝，而當時播緊嘅劇集《情越海岸線》宣傳，都只係出席過一次，其他統統都放晒假。
除咗行動，今次連口供都好相似，鄭嘉穎回覆時話：「我哋兩個感情好好，至於結婚呢，有消息再通知大家！」當時陳豪回覆就咁講：「如果結婚會講，但我要啲私人空間，唔會每個step同大家分享。」
歷史都係相似嘅，如果嘉穎同陳凱琳都係呢個模式擺酒，可能過幾年佢哋都會係個一家五口嘅家庭喎。
來源 source: http://hk.entertainment.appledaily.com
|
鍾意就快D Share啦！
|
|
|
