31歲的林峯堂妹林夏薇，15年嫁給身家逾20億金融才俊莫贊生，結婚三年未有所出，薇薇在無綫劇接劇，作息不定時，今年6月約滿決定不續約，結束七年賓主關係。有指薇薇想趁空檔休息調理身子生B，她日前受訪時直言恨生小孩，身為獨女的她，希望可以生兩至三個子女，為家中添生氣，近日更狂做gym健體，練定腰力陀B。
採訪：陳杰
攝影：沈建程
林夏薇出道時是香港話劇團的全職演員，她想多方面嘗試，於11年簽約無綫加入視圈，薇薇由小花升呢花旦，不過經不起七年之癢，今年6月約滿決定離巢。離開原因，有指薇薇想將重心放在家庭，她三年前嫁給身家逾20億金融才俊莫贊生，結婚三年卻未有所出，薇薇決定利用休息時間調理好身體，準備造人。
| | |
巨蟹要家人
薇薇從前日以繼夜拍劇變「紙板人」，現在天天運動，強健體魄，「調理又唔係完全為咗生BB，只係為健康，生BB係我家庭計劃一部份。」問究竟恨不恨生B，她衝口而出：「都恨。」她表示大部份同學都做了媽咪，聚會中話題就不離湊仔經，「佢哋講嘅話題係返學同湊小朋友，又會玩番啲兒童遊戲，我最近同佢哋玩，發現唔識玩，生一個可以學。」薇薇心中並有家庭計劃：「我想要三個，兩至三都得，因為我係獨女，細個時好悶，我鍾意有兄弟姊妹一齊玩，熱鬧啲，仔女都冇所謂，可以一齊玩，多啲人一齊跑來跑去。」巨蟹座的薇薇又說：「我係巨蟹座，比較居家，屋企排咗第一先，自己生意排第二。」
喜歡做運動的薇薇，目標是強化肌肉，莫非想練定腰力陀B？她說：「我想練番條腰firm啲，想強壯番少少。之前太瘦，增肥增得多又唔得，想練肌肉，好瘦又唔想，先生都覺得我太瘦。」
老公好遷就
剛跟老公慶祝結婚三周年，薇薇說：「食咗一餐飯，原本佢要飛，但專登同我食一餐飯，改晒所有期，我哋兩人之間過好簡單生活。以前大家都好忙，但都願意攞時間出嚟溝通，我拍劇好夜收工，佢會等我，有時我4、5點又開工，佢都好早做嘢，等我好辛苦，我返嚟又嘈醒佢，其實係惡性循環。大家同屋住，冇乜一齊食飯，我節日又要開工，有時菜未上又話要走，丟低佢，但佢又冇投訴嘅，佢好了解我，知我好鍾意自己工作。咁先生同樣熱愛自己工作，我亦好支持佢，兩人互相理解。」
跟薇薇大談生意經，她開的點心店越開越多，連火鍋店，合共有十四間，看到生意已上軌道，薇薇說：「𠵱家好多人嚟同我傾合作，想加盟入股，亦有投資傾合作，睇吓合唔合作到。」薇薇打理生意，但仍會兼顧幕前工作，她說：「再返無綫拍劇，真係要睇時間，我𠵱家停一停，可以用呢啲時間再去學多啲嘢，我又可以返去做吓話劇或唱吓歌，又可試吓電影方面，多咗學嘢機會。」
化妝：江中平化妝室
髮型：Ivan Lee@ Headquarters
場地提供：eliment FitLax（V-Point）
|
鍾意就快D Share啦！
|
|
|