緣份嘅嘢真係好奇妙，一見鍾情，一拍即合呢家嘢，真係唔到你唔信。近年娛樂圈有唔少藝人都失驚無神宣佈結婚，皆因佢哋喺「對的時間，遇上對的人」。即刻睇吓以下閃婚藝人，究竟有幾「即興」。
萬綺雯 陳十三
萬綺雯（蚊蚊）同老公陳十三兩人結婚18年，兩人於1999年時，因拍攝《我和殭屍有個約會II》認識。識咗第7日，陳十三就已經同蚊蚊求婚，蚊蚊當時亦都一口答應。兩人翌年8月喺拉斯維加斯結婚。當時好多人都唔睇好佢哋呢段婚姻，覺得蚊蚊係一時衝動，所以蚊蚊更加想用時間同大家證明佢哋嘅愛情。至今結婚18年，兩人一直都非常恩愛，可以話係圈中數一數二嘅模範夫婦。
余文樂 王棠云
香港第一男神余文樂形象向來玩世不恭，2016年年尾突然公開與台灣皮帶大王千金王棠云（Sarah）戀情，一年後更宣佈兩人婚訊，並留言指：「在對的時間，遇到對的人」。男神宣佈封盤，令唔少少女心都碎埋。今年5月，樂仔仲做埋老竇，不時喺社交網站大曬囝囝余初見（Cody）嘅生活照。父愛滿瀉嘅佢都冇冷落老婆Sarah，有時間都會同老婆Sarah出埠二人世界，sweet到爆！
胡杏兒 李乘德
藝人胡杏兒同黃宗澤拍拖長達八年，2011年獲頒視后嘅杏兒高調示愛：「我哋一路頂住大家」，言猶在耳，仍逃不過分手宿命。2015年，杏兒公開同好姊妹李施嬅舊愛、從事金融的李乘德（Philip）嘅戀情，同年年尾更極速宣佈婚訊！雖然杏兒婚後淡出幕前，不過就依然活躍於社交網站，不時大曬與老公Philip嘅甜蜜生活，有時仲會分享湊仔點滴。
鍾嘉欣 Jeremy
藝人鍾嘉欣（Linda）同脊醫老公Jeremy拍拖唔夠一年，已經情訂終生。Linda接受訪問時，曾剖白呢段嚟得咁快嘅恩緣。原來當初佢哋喺咖啡店相遇，兩人一見面就勁啱傾，性格、價值觀等都好夾，所以佢哋識咗4日，Linda就認定咗Jeremy係佢老公。結婚後，Linda以家庭為重，專心相夫教女。今年初仲再度懷孕，陀住第二胎嘅Linda身材依然好到不得了，真係羨慕死人。
伍姑娘 練海棠
伍詠薇（伍姑娘）21歲時嫁咗畀51歲嘅會計師翁江培，但婚後13日老公因為心肌梗塞離世。後來伍姑娘喺黎姿同好朋友嘅聚會中識咗從事廣告業嘅練海棠，兩人拍拖7個月已經閃婚。雖然多年嚟，練海棠不時都有傳出負面新聞，但伍姑娘一直都企硬撐老公，仲表示對佢百分之二百信任。
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|