再有乘客搭巴士搭到一肚氣，話說周四晚9點幾，乘客麥小姐搭部1A九巴，途中有乘客同車長爭執，搞到車長停低部車，仲成車人無得落車添，足足阻咗廿幾分鐘。而乘客林先生就喺荃灣搭43號九巴，懷疑車長唔識路，結果兜咗入沙田，嘥咗成粒鐘都未返到屋企，真係嬲爆。
麥小姐同林先生都向《蘋果》爆相爆片，麥小姐話周四晚9點幾搭1A九巴諗住返九龍城屋企，部巴士喺尖沙嘴碼頭開出，點知去到彌敦道近佐敦港鐵站就停咗唔開。原來當時有一對夫婦上車，懷疑個男乘客拍卡拍歪咗，俾個車長話佢無畀錢，女乘客喺側邊就同車長嘈，之後仲爆粗鬧車長：「X街司機！」車長聽到咁就㷫嘞，結果唔肯開車仲報警。
最慘就係當時成車客都唔可以落車，麥小姐話有乘客話趕時間，要求落車都唔得，最後搞咗成廿幾分鐘，警員到場先叫啲唔關事嘅乘客落車，留低嗰對爭拗嘅夫婦乘客同車長喺巴士上調查。麥小姐就覺得好嬲，仲同其他乘客一樣，覺得事件之中車長無權唔畀乘客落車喎。
九班回覆指，1A該兩名乘客在油麻地寶靈街站登車，因拍卡問題與車長口角，車長報警處理。九巴督察安排該兩名乘客乘搭其他巴士離開，涉事巴士約半小時後繼續行車。
來源 source: http://hk.entertainment.appledaily.com
|
鍾意就快D Share啦！
|
|
|
