掃呢頁CODE去手機

2018年8月1日 星期三

娛刺撈飯:純情玉女磨豆腐!岑麗香唔識使錢只求愛 __,岑麗香,

做香港人愈嚟愈攰,返工已經要見人講人話,見鬼講鬼話,連返屋企都要對住敷緊Mask嘅老婆話好靚。有時想輕鬆吓睇電視,最慘係千人一面,仲假過「蛇精男」塊面 ...




做香港人愈嚟愈攰,返工已經要見人講人話,見鬼講鬼話,連返屋企都要對住敷緊Mask嘅老婆話好靚。有時想輕鬆吓睇電視,最慘係千人一面,仲假過「蛇精男」塊面,真係熄電視都趕唔切!直到8年前有岑麗香呢股清泉出現,睇電視即時多咗一份莫名嘅樂趣,巴打更喺討論區封佢做女神,可遠觀而不可褻玩焉。

今年睇世界盃最多人喺網上談論並唔係邊隊踢得好,而係巴西球星尼馬插水碌地碌到去2046,潛力圖被瘋狂惡搞之餘,尼馬奧斯卡式演技更被無限上綱話佢假。尼馬嘅假就係好好嘅例子,對比香香嘅真,形成強烈對比。唔扮嘢做自己,香香精神。只可惜佢入行8年往前衝,並唔係乜乜視后,只係平淡咁嫁個好歸宿做賢妻良母,當佢唔再同無綫續約嘅消息傳出,喺宅男心坎中就同霸王級核彈爆發一樣震撼,連我Nuts哥都不禁嘆一句:「還我香香!」

兩分糊塗 五分傻氣

香香從來都係一個可以作心靈對沖嘅對象,記得佢剛入行唔夠兩年參加台慶,同苟芸慧、高海寧、王君馨、黃翠如做綵排,好Pure好Ture嘅佢心情興奮,邊做動作邊話:「我哋今晚表演磨豆腐!」現場氣氛登時一片寂靜,繼而傳來陣陣笑聲,說時遲那時快,在旁嘅高海寧立即掩住香香嘴仔,耳語解釋「磨豆腐」的意思,香香之後仲傻頭傻氣叫記者唔好亂寫,就算寫都唔好寫得太差,記者見佢咁可愛,當然Say Yes。

香香「磨豆腐」磨到上頭條,自此幾乎連呼吸都係娛樂版常客,兩分講嘢糊里糊塗、三分美貌、再加上五分傻氣,成就人見人愛嘅香香,喺宅男左青龍右滑鼠嘅年代,佢呢種高質傻大姐其實只要再等一個機會,就可以變鳳凰,但佢等足8年,原來志不在此。

結婚最緊要溝得埋

Nuts哥有朋友識香香老公強強,佢問過強強點樣抱得美人歸,莫非把口曉轉彎?竹升仔強強話:「一個L兩個F!」即係Love(愛)、Fate(命運) 同Faith(信仰),佢話香香個人真係好簡單,你畀多錢佢反而唔識使,最緊要係大家溝通得到,心靈富足。

香香呢類娛圈絕種動物,彌足珍貴,我哋可以將佢離開TVB前後8年作分水嶺。佢入TVB 8年嘅時光,玩磨豆腐係幾咁純真同冰清玉潔;反之8年後,磨豆腐回復番Lesbian之間嘅玩意……集體回憶永遠是甜的,香香,宅男永遠不會忘記你,強強要好好錫老婆,生個肥肥白白嘅BB,好閨蜜李亞男生完,下個就到你喇!


來源 source: http://hk.on.cc
鍾意就快D Share啦!