DoDo去捧黃子華場。
藝人黃子華尋晚舉行最後一場棟篤笑，揚言話金口唔會再開嘅佢，除咗令一班粉絲唔捨得之外，仲吸引大批好友如容祖兒、周慧敏等人到場支持！當中梗係唔少得同子華合演過劇集經典劇《男親女愛》嘅「螢幕情侶」鄭裕玲（DoDo），於後台同佢合照並留言：「Well done my friend！」
至於同過子華合作劇集《絕代商驕》同埋電影《棟篤特工》嘅佘詩曼，就同埋成班好姊妹好似湯盈盈及文頌嫻等等，齊齊捧老友場，阿佘仲話感動到喊添！而早前同子華推出新歌《子華說》嘅古巨基，亦有份去睇騷，仲問子華：「不捨。可否金盤反口？」
另外，蘇施黃則帶埋密友金燕玲齊齊睇騷之餘，仲好有心思咁送咗個金盤蛋糕畀佢，見個蛋糕勁大個，上面仲有埋個「回水杯」添！
而完成晒棟篤笑嘅子華，就上載一張係鏡面前嘅相，雖然佢只係簡單留言「後台福利-倒數篇」，但佢雙手合十用行動多謝一班支持佢嘅觀眾同朋友，唔少網友都留言恭喜佢完成咁多場騷，亦表示好唔捨得，仲話歡迎佢隨時反口！
來源 source: http://hk.on.cc
|
鍾意就快D Share啦！
|
|
|
