羅鈞滿16年是非多多，因醉駕形象插水，同年年底無綫台慶，佢喺社交網宣佈提前解約，回復自由身。過去兩年，佢行事低調，原來佢已經升呢做咗甜品店老闆喇！
榮升甜品店老闆嘅羅鈞滿，開幕時邀請咗當年劇集《點解阿Sir係阿Sir》嘅好拍檔樂瞳、黃得生、朱敏瀚等人嚟撐場剪綵，四人當年憑該劇扮學生彈出，原來佢哋私交甚篤。
問到羅鈞滿點解有意開甜品店？佢今日回覆《蘋果》時話：「其實四、五年前已經有同幾個朋友有開糖水鋪概念頭，不過當時係TVB嘅工作都好忙，冇時間去將付諸實行。今次機緣巧合之下遇上幾位係果欄工作咗20幾年嘅朋友，大家有開甜品鋪嘅意思，所以好快就一拍即合。而且咁啱喺果欄附近，油麻地戲院嘅對面有鋪位，成件事好快就一步一步咁到今日開張。」
羅鈞滿再話：「今次開甜品鋪都真係學到好多嘢，為咗確保食材新鮮，我都會半夜去果欄幫手學習吓批發同零售，希望可以從上游到下游都出一分力。」羅鈞滿今日親手捧甜品招呼賓客。佢又話：「好多朋友同娛樂圈嘅前輩都話會嚟支持，所以我都希望做得好好睇睇。同埋食甜品係一件令人開心嘅事情，希望每一位食客食完之後，都可以開開心心咁離開。」
樂瞳今早撐場支持，佢自爆有興趣創業：「一直有創業夢，所以今日嚟向羅老闆偷吓師，希望第二時四個可以熒幕上努力賺多啲錢，一齊去搞個生意，最好賣一啲小食。」
精選娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|
