唔知大家有冇留意，單車運動入面嘅競輪賽，竟然有個譯名叫「凱林賽」，呢件事真係令人𢱑爆頭。就算日文「KEIRIN」要音譯， 譯做「騎練賽」，唔係啱音得嚟，仲啱埋單車係要嚟騎嘅意思咩？之不過咁，當你知道要贏「凱林賽」，唔一定要最具爆發力，速度亦唔一定要最快，甚至技術都唔一定要最好，最重要係有合適嘅戰術，加埋少少運氣，咁就乜都明白晒
好似陳凱琳咁吖，三年前同年齡相差二十二歲嘅鄭嘉穎搞父女戀，根本就冇人睇好佢哋，甚至連陳凱琳老竇都用「蝕本」嚟形容呢段戀情。點知陳凱琳唔止成功綁住咗嘉穎，仲搞到呢位出年就到半百嘅冇腳雀仔，興奮到以「帶畀我嘅喜悅、快樂，係從來未試過！」嚟形容老婆仔，完全唔怕你妒忌佢幾十歲人都可以搵番初戀。就算全世界睇死，都可以震到一地眼鏡碎。
毫無保留放閃
雖然話父女戀難得修成正果，係好值得晒吓命嘅。之但係呢位「出爐鄭太」，講乜都老公前、老公後，唔止大爆老公當日點樣喺飛機上求婚，又話老公畀咗個好好嘅婚禮佢，又話老公係自己心目中嘅男神，仲成日「好叻呀、好叻呀」咁讚老公，將個老公捧到上天，呢招梗係係男人都受不過咁喎，咁樣毫無保留以勝利者姿態出現，慌死冇人知佢甜蜜到死咁，就令佢成為咗女人公敵。
講真，陳凱琳之前已經被網民玩針對，攞黃秋生話佢演戲多小動作單嘢嚟借題發揮，又上無綫官網搞事，話口碑不俗嘅《平安谷之詭谷傳說》，冇陳凱琳份演會更好，擺明係紅眼症發作。依家佢唔止第一次談戀愛就順利嫁得出，個老公仲要係王馨平、周勵淇同佘詩曼嘅前度，又點會唔令人恨之入骨，想舔走佢啲甜醬吖！
「一千個願意」𦧲飯應
即係咁，陳凱琳貴為港姐冠軍級人馬，仲要家族資產數以十億計，本身都已經好令其他女士們羨慕妒忌恨。仲要同老公一齊回帶，大講老公喺婚禮上唱當年做歌手嗰首《一千個願意》嘅典故，又話：「想忍住唔喊，但望到嘉穎流咗一滴淚，佢竟然比我早喊。」咁都未算最冤氣。嘉穎爆陳凱琳曾經問首歌係咪講佢，而佢竟然答係，咁都講得出！若果九十年代金曲都可以係講緊九零後嘅陳凱琳，咁當年嘉穎「棒球小子」個朵都係關陳凱琳事㗎啦，因為棒球支棒係直不甩冇曲線㗎嘛，好似陳凱琳咁內外在條件優厚嘅窈窕淑女。
不過話分兩頭，話唔埋嘉穎係講真嘅都唔定。事關十五億駙馬呢個身份，絕對係可遇不可求，你走去問全港所有男士，佢哋都肯定會𦧲飯應答你佢哋「一千個願意」！話之從今以後只可以修心養性，只可被一個人「騎練」吖！
|
鍾意就快D Share啦！
|
|
|
