掃呢頁CODE去手機

2018年9月21日 星期五

【回看高鐵1】局長向主席卿姐敬禮 反高鐵骨幹朱凱廸:時光倒流我會... __,朱凱廸,

2004年,房屋署的商場和停車場計劃化身「領匯」上市,被鄭經翰大力反對,引來大批民眾示威聲討。今日,大家都深明「領展之惡」。2009年,由一班青年人發 ...




2004年,房屋署的商場和停車場計劃化身「領匯」上市,被鄭經翰大力反對,引來大批民眾示威聲討。今日,大家都深明「領展之惡」。

2009年,由一班青年人發起的「反高鐵停撥款大聯盟」,亦被民眾指「阻人搵食」。當年大聯盟的骨幹之一朱凱廸今天回想:「有啲道理原來越耐嘅時候,越驗證到佢係正確。」接近十年過去,當年的反對理據經得起時間考驗。

在正式通車前,讓我們回顧這條僅廿六公里,造價卻高達$844億的鐵路,對社會、社運、議會甚至是法制的影響,不讓一路向北的高速列車帶走這些教訓。

-----

二零一零年一月一日,任立法會財委會主席的劉慧卿邀請了「反高鐵停撥款大聯盟」成員朱凱廸上她的網台節目「議會內外」,大談反高鐵的策略。

如今兩人的身份已經一百八十度改變:劉慧卿在前年結束了廿五年的議會生涯榮休;朱凱廸則由社運份子搖身一變成立法會票王。剪掉了當年一把長髮的朱凱廸,回想起反高鐵運動之初,自己對議會運作可謂一無所知:「嗰陣我都唔知有個『立法會工務小組』,過完工務小組又要過財委會。」

苦行扭轉民意

反高鐵運動在零八年由菜園村迫遷問題引發,卻長時間處於民意劣勢。零九年年中城大專上學院社會科學部的調查就顯示,只有約16%市民反對興建廣深港高鐵,逾8成人支持。朱凱廸仍記得,當年十二月初高鐵撥款首次被交到工務小組討論時,議會外的集會如何冷清:「第一次都係好少人。嗰陣我哋仲未做到場外影像直播,成班人淨係喺出面聽住個收音機。」

但隨著一次又一次的場外示威,凝聚的力量都越來越大:「每次隔一、兩個禮拜,再儲民意,再諗吓下一次點做好啲,就一次比一次多人,技術就會好咗,錢又會多咗。」當年的運動被標籤為「八十後的抗爭」,大部份反高鐵的中堅都是二十多歲的年輕人。他們以朝七晚十二、每廿六步一跪的苦行感召市民。民意到一零年一月初被扭轉,港大的研究顯示,有45%市民反對或要求擱置高鐵撥款,而同期支持興建的則有47%。即使香港高鐵在工務小組順利獲得通過,數以千計的市民仍未放棄,繼續包圍立法會向接續上演的財委會施壓。

公平為先 立場最後

「我自己做咗財委會主席七年,我好多謝議員,係議員選我架喎。有一、兩次仲係冇對手之下過。」劉慧卿回望過去在財委會的歲月,總難掩自豪:「有次仲好笑,同陳鑑林選,平票啊,抽籤佢都輸埋。」

但面對均勢的兩邊民意,經驗豐富的卿姐早料到這會議將是極大挑戰:「咁梗係好大件事」卿姐話,她當年已不贊成高鐵撥款議案,但坐在主席台後面,她從不考慮自己的立場;特別是夾在堅決要高鐵上馬的政府、「打爛沙盤問到篤」的議員們以及臨近沸騰的場外民眾之間,更要堅守主席的角色:「要好公開、公平、公正,搞好個場去俾人發表意見,令到大家都無得投訴。」

卿姐記得,財委會正式召開前,她和時任運房局局長鄭汝樺坐低商討會議安排。當年的鄭局長為求高鐵上馬,不怕與議員耗時間:「鄭汝樺話:『開二十節』咩話?即係四十個鐘喎。我話你係咪發癲啊?『啲議員要講嘢啊嘛,我咪俾佢講囉。』」劉慧卿於是託時任立法會秘書處秘書長吳文華,諮詢各議員要發問的問題:「於是加加埋埋,就應該只要十四節內。咁局長梗係贊成啦,二十佢都制喇。」

但在泛民議員窮追猛打下,財委會由零九年年尾開至一零年,到一月十六日,經過四日合共三次會議,依然無法進入表決。「普通做法就梗係話休會啦,下次搵個時間再開。但我覺得都就嚟完,於是叫秘書諮詢議員,話我想繼續落去。」結果在取得建制、泛民議員們的共識下,兩度加時,高鐵撥款議案才能附諸表決。「佢哋都知道,就算講夠六十節,有啲位政府都唔會褪架啦。」

「嗰兩次,我話要加場,我係好小心去做。」卿姐話,身處議會內不能只顧大樓內發生的事,也要留意民眾的情緒:「如果我突然有個決定係好爭議,議員喺度瓜瓜嘈,一定影響到出面。當你知道門口有成萬人,個個好似老虎仔『唬唬聲』,咁你更加要小心啦。冇理由坐喺個主席位,講啲好挑釁嘅說話嚟刺激佢哋架嘛。」當日劉慧卿亦曾提議過為會議「劃線」,定結束時間,但在泛民議員強烈段對下收回建議。

最終在當晚六時半,立法會的表決鐘聲響起兩分鐘後,廣深港高鐵香港段的首項撥款以三十一票贊成、二十一票反對獲得通過。整項議案討論了超過二十五小時,是當時立法會審議單一項目的最長紀錄;當中議員更合共提問了二百四十七次,數量亦創當時新高。

「我好高興之後各方面係冇咩人批評我。」當日所有議案通過後,鄭汝樺特地走到台前,將右手放到額角,向卿姐敬禮。「第二日佢仲送咁大包花俾我,我嚟手送咗俾秘書長吳文華囉。」同月明報更以「民主派掌權不是洪水猛獸」為題撰寫社評,指劉慧卿主持會議的表現足證泛民主派都有上台執政的能力。

議會內同外的期望落差

但對於包括朱凱廸在內的場外民眾,表決鐘的響起等於「突然死亡」:「嗰場仗基本上就係輸咗。」

「議會內同外係有個落差。」

當日議案一通過,數以千計的反高鐵市民就衝出馬路,包圍整棟舊立法會大樓;有部份示威者嘗試衝開警方鐵馬,更有一大班民眾手挽手躺在遮打道佔領馬路。「我哋嗰陣會覺得,我成世人係砌呢鋪架喇,好多人都瞓晒身。」朱凱廸嘆道。當日有數千港人留守立法會,逾千名警員出動胡椒噴霧及防暴盾驅趕,是當時回歸後最大型的警民衝突。

「但個議會本身都冇個心態係要鬥贏(政府),我感覺到。」當年「點人數」、海量的修訂案等真正的拉布手段皆未出現:「嗰陣都未有人諗過要咁用財委會(拉倒議案)。嗰陣連黃毓民都未開始拉布。」該次財委會最激烈的場面,就只是毓民在預備會議中與詹培忠互相指罵。

但朱凱廸認為,當時的反高鐵民眾亦並非單純得期望單靠議員們就可以將議案拉倒:「我哋出面對議會有好樸素嘅期望就係,希望佢哋頂耐啲啦...頂耐啲我哋出面就捱耐啲,會聚集多啲人架喇。」他們期望最終有個「零三七一」的翻版:「田北俊倒戈、田北俊跪低!我哋期望出面要好多人,多人到入面啲人要好驚嘅。」

朱凱廸沒有怪劉慧卿未用盡主席的權力嘗試拉倒高鐵:「我可以想像,其實嗰日如果你又再捱到,即係如果劉慧卿佢用非常手段令到個會延長,咁可能再下一次,政府嘅壓力係會再大啲。但係咪會大到令到佢要撤回呢?我覺得又未至於。」

若再重來...

經過8年沈澱,朱凱廸回望整個高鐵抗爭,他認為有可能改變形勢的契機並非在表決當日,而是在早一個晚上。當日的財委會結束後,近三千民眾由中環步行到上亞厘畢道,途中衝破了警方防線,聚集在禮賓府外要求特首曾蔭權對話。

「上到去先發覺,人真係好多,成條上亞厘畢道爆晒架喎。有啲人就話,不如唔好走啦。」但當時反高鐵停撥款大聯盟已和群眾約定要和平散去,翌日繼續立法會外的抗爭。「俾我揀多次,可能我會大膽啲留低囉,可能會係另一次佔領嚟架喎,冇人會清到你走。」

「嗰次應該係自從六七暴動後,都冇試過咁多人咁樣上禮賓府。其實係幾symbolic。對一個唔民主嘅政府嚟講,民眾示威,無非係想佢交返個權力出嚟。嗰次係對準個權力核心好大嘅抗議。」

不過時光不能倒流:「你係冇辦法想像,同樣嘅處境可以複製多次。」

議會暴力越演越烈

劉慧卿記得,當日財委會結束後,鄭汝樺和一班建制派議員從舊立法會大樓東面的後門離開,前往停車場,登上政府一早預備好的van仔。無奈民情太洶湧,各人只能重返大樓內躲到半夜。相反卿姐施施然由正門離開,沿路無任何阻攔。

回想整個審議高鐵撥款的過程,由場內到場外,可有關鍵的時刻扭轉局勢,阻止這條引起十年爭拗的鐵路上馬?「我覺得無辦法架喇。」卿姐答得直接卻略欠想像力:「因為你唔夠人投票反對嘛。」她認為,即使外面群眾的行動做得再激進,都不可能停止高鐵駛入香港:「我成日都同啲年青人講,你幾時暴力得過啲警察?你幾時暴力得過解放軍?你搞到血流成河,咁又點姐?咪第日又過。」

「但嗰次確實係『議會暴力』,因為佢多人多票,就格硬投贏我哋囉。」高鐵撥款議案不單突顯了立法會功能組別缺乏廣泛代表性所形成的「議會暴力」,更顯示香港政府只求議案通過,不善甚至不求在議會內以至在社會上化解分歧、凝聚共識的施政方式。「政府始終冇吸取教訓。當你有好大嘅矛盾,你應該多啲同議員溝通,去妥協、去搵個共識。」

高鐵會議揭示了議會內泛民和建制之間的僵局,往後在議會內的紛爭只越演越烈。建制派為求控制會議,開始佔據各委員會的主席位置。部份泛民議員為阻撓惡法,亦不再只向官員窮追猛打發問,其他更激進的拉布手段亦漸派用場。在政府施壓下,建制派剪布手段就越見粗暴,議員被趕出會議廳屢見不鮮;曾鈺成的「返嚟就郁」言猶在耳;陳鑑林憑直覺「認為」高鐵追加撥款獲得通過依然歷歷在目。長毛、毓民等唯有靠「掟蕉」、衝主席台回敬。「梁君彥都呻,『政府話自己處理唔到嘛,我咪要硬啃囉。』政府唔肯去理順個議會,就掟嚟立法會,數夠票就過啦。」

八黨共識

劉慧卿認為,高鐵撥款所反映出的議會僵局,其由來可追溯到更早之前:「議員本身好多嘢係可以大家妥協到。」

在九七前、後,立法局以至立法會曾經有過「八黨會議」,議會內各黨派各自派出代表,開會商討社會上的爭議,祈求在會議外達至共識:「每一個月各黨輪流揸莊,你揸莊嗰個月,如果有突發嘢,認為要開會傾嘅就吹雞,八黨坐埋嚟傾。」

這個「八黨會議」在多個重要時刻都曾發揮過關鍵重要。零一年美國發生911恐怖襲擊,嚴重打擊全球經濟:「我同田北俊講,喂八黨開會好唔好?大家就即刻開會。傾晒啲刺激經濟嘅建議。」八黨將建議交予時任財爺梁錦松,結果大部份建議就出現在翌年的預算案中,順利通過

零三年沙士在淘大花園嚴重爆發:「我哋嗱嗱臨八黨坐低,傾咗都唔使半個鐘,大家就決定要隔離淘大花園。董健華個人船頭驚鬼,船尾驚賊,邊度夠膽出嚟話隔離,佢驚人暴動嘛。我哋八黨企出嚟,我哋同你揹飛。」結果八黨開記者會提出建議後數天,政府終宣佈將淘大隔離。

但這種尋求共識的方法很快失效。零四年立法會選舉後,首次參與直選就順利當選的田北俊表示,以後不會再有「八黨會議」:「點解啊?『中聯辦反對。』點解反對啊?『八黨係將香港扭轉,香港係行政主導,你而家變咗立法主導,咁就唔應該。』」

「俾人鬧一鬧 ,嗰班失匙夾萬就全部唔敢搞喇,但政府話自己主導,又冇能力主導,咪搞到而家咁嘅死樣囉。」

記者:關冠麒 林碧君

攝影:廖健昌 于港民
【回看高鐵1】財會主席卿姐:局長直頭向我敬禮 反高鐵骨幹朱凱廸:議會內外有落差



鍾意就快D Share啦!