9月2號啱啱83歲生日嘅曾江，近年主要拍內地劇集，不過，佢諗住拍少啲，多啲留喺香港。
好似呢日喺九龍城見到佢，行路依然拐拐下，耳仔戴住助聽器，話晒都八十有三，年紀大喇。
仲記得15年，佢同謝賢、Joe Junior同胡楓主持《四個小生去旅行》，記者會上佢俾謝賢摑一巴，好敏捷咁閃開咗，可惜，今時唔同往日喇！
平時唔覺佢咁肥，呢日見佢，有個大肚腩，目測佢至少肥咗十磅，行多兩步摸摸個大肚腩，再喘吓氣！如果今日謝賢再摑佢，佢應該避唔到。
呢日陪住佢嘅，係同佢結咗婚24年嘅老婆焦姣，咁佢啲仔女呢？平時唔多覺曾江提過嘅？
是咁的，除咗現任太太焦姣，曾江仲有過兩段婚姻，分別係1969年結婚，79年離婚嘅藍娣，及80年結婚，90年離婚嘅鄧拱璧。
曾江同藍娣有個仔，同鄧拱璧有個女，
不過，大仔喺溫哥華住，好少見面！個女叫曾慕雪，係個舞台劇演員，上年結咗婚，汪明荃都有去飲佢嗰餐。
曾江好少提對仔女，因為大家關係疏離，佢曾經講過，有仔等於冇仔，反而，同個女近幾年關係好咗，見多咗！
年紀大咗，曾江嘅性格都變咗，以前佢好霸道，乜都要話事，自從同焦姣一齊後，竟然會變到怕老婆。
曾江83歲行得走得，老婆焦姣每日都會陪佢遊街做吓運動，家住九龍塘，每日落九龍城買餸，買完嘢由九龍城行番九龍塘，人老了，生活平淡一啲，有個伴陪著走，就算仔女唔黐自己，有焦姣喺身邊，曾江一樣好快樂。
攝錄：蕭敬漁
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
