內地女星范冰冰捲入「逃稅風暴」以嚟，已經「神隱」逾百日，日前有內地傳媒喺佢豪宅門外，發現冰冰名下多架價值千萬嘅靚車都唔見咗，有傳佢嘅事業同人身安全陷入危機！
據內地媒體報道，冰冰位於北京三里屯嘅豪宅，𠵱家樓下只停泊咗一架保母車，呢架車係佢平時拍戲代步用。而冰冰名下嘅其他貴車，包括Benz同用嚟炫耀嘅勞斯萊斯，仲有傳男友李晨求婚嗰陣，送咗架價值逾千萬嘅麥拿倫超級跑車畀佢，不過𠵱家統統唔見晒，於是有傳媒質疑佢為咗防止被查封而將名車提早過戶！
被爆吸金大法
另外，有內地傳媒狠批冰冰捲入逃稅災難，盤點冰冰由《還珠格格》扮演丫環「金瑣」，一路努力向上爬，結果蟬聯五年《福布斯》中國名人榜首位。踢爆冰冰嘅吸金大法，就是靠開出天價片酬、成立工作室、去外國投資物業買樓收租，有傳冰冰喺加拿大七個大學校區都有物業揸手，單單係收租，都有350萬港元進賬。由於同內地提倡「禁奢」、「均富」嘅風氣背道而馳，日前喺中國社科院「中國影視明星社會責任研究報告」上，冰冰竟然被批零分包尾。
撰文：馮仁昭
|
鍾意就快D Share啦！
|
|
|
