自從莊端兒喺網台做性感主持，心口掛住一個爆字，令佢絕地反彈。鏡頭前同杜汶澤攪笑嘅「Double May」，行返入娛圈之前，原來有過尋死念頭。
「我要多謝佢，因為真係佢 經歷咗我同Steven嘅一段關係，經歷佢嘅花言巧語，我而家面對所有男性嘅花言巧語都係好有定力，係無咁容易追到我。」莊端兒講嘅係前度Steven(張智恆)
曾經有過一段不偷快婚姻，因為對方偷食而結束關係，到前度Steven，又一個惡性循環，莊端兒傷透離場。「其實係一個經歷，當時當然係傷心。已經過咗去，嗰一刻真係釋放唔到係會好嬲，但依家已經唔再嬲呢個人。甚至可以聯絡做朋友，無問題嘅，我都祝福佢。佢而家拍緊拖。有時聽到一句好傷心說話就係，你為個男人做咁多嘢，他日原來為別人教老公，而家真係幫人教老公添！」莫非暗示依家嘅Steven真正修心養性嘛！
曾經想做傻事，其實唔係單一為感情。「感情、事業、健康都同時出現問題。當時好唔開心，任何一個人企喺我面前講說話我都唔想聽，直情想封閉自己，當時又要扮無嘢，要喺Instagram話自己成日都飛，唔喺香港，一離開香港就覺得舒服好多。
到最後其實屋企人幫咗好多，我曾經真係有企圖諗過一啲唔好嘅嘢，真係覺得頂唔順，唔想再咁樣繼續落去，覺得人生其實好痛苦，
所以喺嗰段時間好差、好低谷。
後來阿媽就同我一齊揭啲相簿，睇番細個幾得意，我養得你幾辛苦，我含辛茹苦湊大你 就一直喺度不停講，佢真係用咗好多時間去陪我，有一段時間直情搬埋嚟同我住，陪我去旅行，嗰時佢都驚我會做傻事。
當我真係有衝動去做唔好嘅嘢，突然我啲貓又好識性咁走嚟嗲我，嗰刻醒一醒，會諗如果我走咗，邊個照顧佢哋，有六隻貓我要對佢哋負責任，唔好話動物，我對家人都要。如果我走咗去，係咪「遊玩時開心一點不必掛念我」呢？係咪真係可以咁瀟灑呢？原來唔係！」
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
