熱爆娛樂: 【狗仔出更】揸的士中環四圍兜？張振朗：報酬唔錯，開心嘅 _

2018年9月11日星期二

【狗仔出更】揸的士中環四圍兜？張振朗：報酬唔錯，開心嘅 __,張振朗,

張振朗憑住聲音同外貌同張智霖有幾分相似，加上抵死搞笑嘅演繹手法，令到佢呢幾年人氣急升，工作亦都接踵而嚟，豬籠入水。日前一個下晝5點左右，《蘋果》見到佢喺中環大會堂對出拍廣告，張振朗揸住部的士四圍兜。

當時車後住有一名手持紙紮菜刀嘅乘客，開始拍攝時張振朗將車由大會堂駛出，喺中環兜咗一個圈後，返回原點。張振朗一落車就睇返拍攝效果。睇完回帶之後，就有人上前幫佢補妝同整理髮型，之後張振朗就上返七人車稍作休息。到拍第二個鏡頭時，後座乘客已經換上套古裝登場，張振朗照住第一趟嘅路線在區內兜圈，不過今趟拍攝沒有第一次咁順利，先後拍咗3次至收貨。

今次接拍銀行廣告，張振朗都有喺自己Instagram分享，原來佢已經拍咗兩日，仲留言：「吸引力法則！相信就有希望！果然真係連續兩日都好天！Fit過London la」，用返成名作《踩過界》嘅名句嚟感謝天公造美，風和日麗。張振朗早前回應傳媒表示：「嗰日係幫大新銀行拍廣告，拍咗20幾個鐘，拍足兩日。廣告都幾得意，拍幾個video。構思funny，睇落都搞笑。」佢話廣告概念係飾演的士司機嘅自己，載住好多奇怪嘅乘客，個個都有唔同造型，原來呢班朋友要撈好多份工，換好多套衫做兼職，張振朗話：「都好開心，第一次拍銀行廣告，報酬唔錯，開心嘅。」

精選娛聞，喺晒《娛果》

http://fb.com/appledailyent

（採訪、攝影：畢紹基、孔志豪）	演的士司機都係一個幾新嘗試。	 拍攝當日天氣放晴冇雨落。
 張振朗一落車就有人同佢補妝。	 一落車張振朗好緊張睇返拍攝效果。	 今次係用輕鬆搞笑手法，帶出銀行訊息。
 張振朗揸住部的士不停係中環兜圈。	 用成名名句「Fit過London」形容今次拍攝。（張振朗Instagram圖片）