中秋佳節，大家都離不開同家人食飯賞月，開心過節咪幾好，但因乜解究，元朗呢位阿叔咁躁底，問候巴士司機娘親之餘，仲要郁手兜巴星，結果搞到過節都俾阿Sir「的」返差館？
讀者何先生做完節，由上水搭278P九巴返元朗，當11點幾去到又新街準備埋站時，由於前面有巴士頂住，司機先畀乘客落車，駛前少少再畀人上車，點知一位阿叔，一上車就粗口橫飛，以為司機唔畀佢上車。司機不甘受辱，上前理論，點知阿叔出手，一巴摑向對方，司機嘴角受傷。
「其實雙方都有唔啱，大家冷靜啲就冇事。」好多乘客最終都要落車，而何生就選擇行廿分鐘返屋企。據悉，九巴已經搵涉事司機了解，由於司機受傷，點都係受害一方，所以唔會處分嗰位司機。警方回應話，當晚11點幾，姓翁（35歲）司機被姓溫（49歲）乘客襲擊，司機嘴部受傷需送院，該名乘客涉嫌「普通襲擊」被捕，交由元朗警區刑事調查隊第七隊跟進。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|