【母女的驕傲】
開學了！父母不易做，98年落選港姐傅楚惠上月中獲選為「十大傑出家長」，11歲女兒孫蔓而 （Chloe）去年亦成為香港小太空人，母女俱是彼此驕傲。傅楚惠與囡囡日前一同接受《蘋果》專訪，她分享成功之道：「我經常代入佢嘅身份去睇事物，好似佢坐喺BB車時，我會踎低，喺佢角度睇佢嘅世界。」
撰文︰祖李
攝影：陳慧安
拍過不少無綫劇的傅楚惠（前名傅楚卉），06年婚後淡出娛圈，專心相夫教女，近年才重返幕前。傅楚惠上月獲選為「十大傑出家長」，參選的原由也是女兒的鼓勵，傅楚惠日前與女兒孫蔓而一同接受《蘋果》專訪，她透露去年與女兒翻閱親子雜誌，發現這個選舉，女兒靈光一閃，興奮又雀躍的嚷着要母親參加，Chloe更是提名人。
傅楚惠笑說︰「平時都係我鼓勵佢參加比賽，今次佢調番轉鼓勵我。我諗深一層，如果我退縮，咁我以後叫佢參加比賽咪冇說服力，所以就膽粗粗試吓。」過往得獎者不是校董就是教育界頂尖家長，所以傅楚惠得悉自己當選是百感交集：「嗰刻開心之餘亦好感觸，做一個家長並非輕鬆容易嘅事，呢十多年我同佢一齊成長，經歷好多嘢，有喜有悲。」
代入女兒身份
成功非僥倖，傅楚惠的教女心得是與女兒同步︰「我從來都唔做虎媽，亦冇一個方程式湊女，一切都是源自愛同嗰份同理心，我經常代入佢嘅身份去睇事物，好似佢坐喺BB車時，我會踎低，喺佢角度睇佢嘅世界，但我要同佢分享我嘅感受時，我就會抱番高佢，然後再了解佢嘅睇法。」
原來Chloe從小就對自己要求很高，正因女兒讀書已經壓力很大，傅楚惠不會再額外催谷︰「功課上學校已經做得好好，學術上我唔會再加壓，我反而做一個角色幫佢抽離，等佢有個空間放鬆，可以學習自己嘅興趣。」Chloe透露每當自己在書房溫習太久，媽咪反而會讓她停下來︰「媽咪會同我講close your eyes，open your mouth，然後佢會放粒朱古力入我口。」讓女兒由外至內甜入心。
| | |
怕黑變愛星星
好母親要懂得誘導子女，Chloe自小怕黑，傅楚惠就將囡囡的弱點轉化為興趣。Chloe說︰「有次我發現窗外有點光閃呀閃，原來係星星，我以前以為世界就只有地球，後來媽咪話我知太空有好多唔同嘅星體，我就提起咗興趣，自己去圖書館睇書，想了解多啲，後嚟媽咪見到有小太空人計劃，就鼓勵我參加。」去年Chloe從近二千名小朋友當中，脫穎而出成為「小太空人」，得以到美國太空訓練營及甘迺迪太空中心與太空人交流。Chloe近年多了一個興趣，就是英語話劇，去年更取得香港校際話劇節的「傑出演員獎」。
女兒愛上演戲，身為母親的傅楚惠亦繼續演藝事業，不過她同時要幫媽咪打理地產生意，又要湊女，更要讀書，惟有犧牲自己睡眠時間。傅楚惠說︰「時間分配係吃力，呢十年嚟我好少同朋友聚會，分一半畀囡囡，一半畀工作，寧願自己瞓少啲，但過程開心、有滿足感。但因為有咗小朋友，反而事業心湧出嚟，因為要諗將來。𠵱家我仲讀埋幼教課程，希望將來可以喺呢方面發展。」
做演員是福氣
成為母親後，傅楚惠學懂放下了昔日港姐的外表包袱︰「以前做戲成日都會顧住靚唔靚，只係嘻嘻哈哈，有好角色都唔識拿揑，我好記得當時同黃德斌拍《妙手仁心II》喺沙灘拍談情戲，當時我一路拍一路驚，唔知點做。反而𠵱家成長咗，感受多咗，感情層次都唔同咗，就冇咗外表包袱，好似之前拍電影《哥基王子》，我飾演一個智障女，戲裏面冇對白，零化妝，同我戲中嘅嫲嫲羅蘭姐好多內心戲演繹，enjoy個角色。可以做藝員係福氣，我哋內心有好多情感，生活上未必可以表達出來，𠵱家攞住個劇本已經好多嘢想表達。」
作為「母親」這個角色，傅楚惠演繹得好嗎？在Chloe眼中，媽媽是智慧與美貌兼備︰「佢係一個好靚亦好叻嘅家長！好多家長會逼小朋友去學興趣班，但佢會畀我選擇。每次我做錯嘢，媽咪只會話只要你自己知道錯啲乜，下次改過，我就原諒你。」
化妝、髮型︰MoMo Chow@嫁妝Ms.Workshop
場地提供︰HEXA六公館
|
鍾意就快D Share啦！
|
|
|