父王郭富城今晚應邀喺灣仔君悅出席救助兒童基金會「童心迎悅」慈善晚宴，徐子淇就以今晚晚宴籌委會主席兼贊助人身份現身，同場仲有溫碧霞、朱潔儀、趙世曾同女伴、何正德同太太林恬兒及林心兒等到場提早慶中秋。
近日忙住為新戲《無雙》宣傳兼為電影《麥路人》開工嘅阿城，專程喺韓國趕回港出席活動。徐子淇同阿城齊齊受訪，徐子淇話今晚籌款目標為柬埔寨起9間學校，感謝阿城專程現身：「佢做咗爸爸，對小朋友嘅事特別關心。」
問到阿城會唔會抽空到柬埔寨探訪？佢話：「除咗我自己，我仲想帶埋小朋友去，等佢哋大啲就帶佢哋去睇下，等佢哋嘅成長有正面、正能量，去幫助其他小朋友。」徐子淇問佢係咪為人父之後感覺更強烈？他稱：「係呀，做咗爸爸責任重大。」
那大家可有交流湊仔心得？徐子淇笑指阿城已經好熟手：「我都唔記得啦，我嗰啲都大晒。」阿城就話自己個女都一歲，仲有好長時間去學習：「令佢有好嘅知識去改變自己，去幫其他人，爸爸係好大責任。」工作咁忙，點抽時間陪囡囡？阿城笑謂：「我啱啱喺韓國返嚟，開緊工，自己都盡量喺香港工作，香港工作就最好，可以照顧到家人。」
提到早前阿城話過鍾意人多嘅家庭，記者正想開口問係咪可以恭喜佢嘅時候，未問完阿城已經話：「今日唔講呢啲，有好消息會同大家講，暫時無可奉告。」
咁有4個小朋友嘅徐子淇會唔會鼓勵阿城再生小寶寶？佢即刻同阿城講：「一個唔夠熱鬧，要生多啲。」阿城即點頭：「係會熱鬧啲，我之前都講過順其自然，總之有好消息會同大家分享。」
|
鍾意就快D Share啦！
|
|
|