一代名伶吳君麗前晚離世，享年84歲，令不少圈中人大感惋惜。8歲入行做童星的薛家燕與吳君麗合作無間，關係親厚，家燕姐前晚接到噩耗，接受電話訪問時哽咽道：「麗姐睇住我大，佢好錫我，對我好好，佢係一個好好嘅前輩，佢好慈祥，臉孔永遠留喺我腦海中。」
粵劇名伶、「八牡丹」中的白牡丹吳君麗前晚離世，享年84歲。死訊傳出後，震撼娛圈，吳君麗近年偶會出席公開活動，最後現身就是6月11日薛家燕娶新抱，吳君麗當天精神奕奕與胡楓等好友到賀，沒想到三個多月後離世，令人傷感。吳君麗妹妹前晚向友人發出訃告短訊，至於大殮日期地點就容後公佈，下款寫上吳君麗治喪委員會。
| 吳君麗60年代與七位粵劇女星結義金蘭，組成「八牡丹」。 | 吳君麗多才多藝，除了唱粵劇、演戲外，亦會彈古箏。 |
中秋曾傳短訊慰問
童星入行的薛家燕與吳君麗合作多次，家燕姐前晚錄影節目途中，接到吳君麗死訊，心情忐忑，家燕姐前晚在電話中，不停哽咽道：「拍到一半接到麗姐去世消息，我當時好愕然，因為中秋節嗰日我仲有傳短訊畀佢同佢好朋友MiMi，祝佢哋中秋節快樂。MiMi覆我，諗住麗姐有接到我訊息，唔知係咪嗰時佢病緊？我真係唔知，但我真係好難過，想喊出嚟。」
家燕姐續言吳君麗從小看着她長大：「我入行冇耐就同佢拍電影，唉，佢好錫我，對我好好，我囝囝結婚請佢飲，佢話一定嚟，佢話好開心見到我個仔大。知道佢走，好難過，想喊，但要做節目冇辦法。麗姐係一個好好嘅前輩，佢對電影、粵劇都有好大貢獻，好難過佢離開我哋，佢好慈祥，臉孔永遠留喺我腦海中一直好深，佢好好教導我哋。」
粵劇名伶蓋鳴暉前晚以短訊回覆，她說：「這位前輩又和藹又健談，對後輩談笑風生，麗姐，一路好走。」大老倌阮兆輝與吳君麗相識數十年，他昨在鑽石山出席活動時說：「大前日先知佢病情嚴重，原打算今日工作後探望，噚晚收到朋友通知麗姐死訊，佢息影後唔係成日見，對上一次係上年飲茶，佢冇透露有病，只聽聞佢舊年曾入醫院，佢工作認真，好人又和藹。」「七公主」大家姐馮素波表示近年看粵劇有碰到吳君麗：「早排聽聞佢跌倒，腳痛入咗醫院，唔知佢情況。」
近年熱衷搞粵劇的李居明前晚接受訪問，他透露亡父是吳君麗忠粉，又指吳君麗曾在88年8月8日跟他去日本拜佛，兩人惺惺相惜：「我幫佢睇過風水，我喺新光搞大戲，麗姐成日嚟睇戲，佢好愛錫我哋。」「八牡丹」中的「銀牡丹」羅艷卿前晚也表示惋惜：「我哋當年係八牡丹，但我哋冇合作過，好少來往。」
銀牡丹羅艷卿惋惜
吳君麗08年曾復出拍劇，當時她接受家燕姐電台訪問，保養得宜的吳君麗飲食清淡，每餐蒸魚配烚菜和喝湯，注重健康的她每日堅持運動一小時，但她謙評自己人生只值40分。為紀念這位巨星殞落，無綫將於後日上午6時重播她與胡楓主演的《青青河邊草》，下周一凌晨3時35分播出她跟任劍輝的《一彎眉月伴寒衾》。
採訪：陳杰、嵐山、魯吉
|
鍾意就快D Share啦！
|
|
|
